كوڕە شەهیدێكی یەكێتی پلە سەربازییەكەی جێهێشت و هاتە هەولێر

گۆران شەهید گەوهەر كەسێكی دیاری سەربازی یەكێتی نیشتمانی كوردستانە، كە لە خورماتوو دەوامی دەكرد پلە سەربازییەكەی جێهێشت و هاتە هەولێر

لە نووسینێکدا لەلاپەڕەی خۆی نووسیویەتی، “گۆران شەهید گەوهەر هەر لە منداڵیەوە بەكاتێكی سەختتدا تێپەرێوە و لەدایك بووە بەو پێیەی لە تەمەنێكی بچووكدا دایك و باوكی لەدەستداوە و كاتێك بێ دایك و باوك بووە تەمەنی تەنیا شەش ساڵ بووە ئەم ڕووداوە سەرەتای گەشتە سەختەكەی بوو لە ژیاندا، لەو ساتەوەختەوە بەتەنیا دەستی كرد بە ژیان و هەوڵی دەدا لە جیهانێكی سەختدا بژی، بە تێپەڕبوونی كات و لە تەمەنی 13 ساڵیدا پێوەندی بە ڕیزەكانی هێزی پێشمەرگەوە كرد و لەوێ خەباتی بۆ دووزخورماتوو دەست پێ كرد”.

هاوکات دوای رووخانی ڕژێمی سە*دام حو*سێن لە ساڵی 2003، گۆران شەهید گەوهەر بوو بە یەكێك لە سەركردە دیارەكانی ناوچەی خورماتوو، وەك خۆی دەڵێ‌، تا ساڵی 2016 درێژەی بە كاری سەربازیی خۆی دا و پێوەندی بە دەزگای دەژتیرۆرەوە كرد لە سلێمانی و ئیستە پلەی عەقیدە وە بەردەوام بوو لە بەرگریكردن لە گەلەكەی ، بەڵام بای سیاسی گۆڕانكاری بەسەردا هات، ناكۆكییە سیاسییەكانی ناو یەكێتی دەستیان كرد بە كاریگەری ڕاستەوخۆ لەسەری.

دوابەدوای ناكۆكییەكانی نێوان لاهور جەنگی و بافل تاڵەبانی لە دوای ساڵی 2021 گۆران شەهید گەوهەر پەراوێز خرا نەیتوانی هیچ پۆستێك لە حزبەكە یان لە دەزگای دژە تیرۆر بەدەستبهێنێت، ئەم پەراوێزخستنە كاریگەری گەورەی لەسەر ژیانی سیاسی و سەربازی هەبوو، دوای چەندین ساڵ فیداكاری و تێكۆشان سەرەنجام وازهێنانی لە حزبەكە و ژیانی بەرەو هەولێر هەڵبژارد بۆ گەڕان بەدوای ڕێگایەكی نوێ دوور لەو ناكۆكییانە.