سیستەمی دیجیتاڵی بەڕێوەبردنی مووچە پاڵپشت بە پێناسی دیجیتاڵی ڕاگەیەنرا
فەرمانگەی تەکنەلۆجیای زانیاریی حکومەتی هەرێمی کوردستان بەرهەمهێنان و بەردەستخستنی سیستەمی دیجیتاڵی بەڕێوەبردنی مووچە، کە پشتبەستووە بە پێناسی دیجیتاڵی، ڕادەگەیەنێت. ئەم دەستپێشخەرییە، لەسەر ڕاسپاردەی سەرۆک وەزیران جێبەجێ کراوە و هەنگاوێکی گرنگە بۆ دامەزراندنی پرۆسەیەکی سەردەمییانە بۆ ڕێکخستنی خشتە و کاروباری مووچە لە دامودەزگاکانی حکومەتدا.
ئامانجی ئەم سیستەمە ڕێکخستنەوەی پرۆسەی ئامادەکردنی خشتەکانی مووچەیە بەشێوەیەکی سەرانسەریی لە کەرتی گشتیدا لەڕووی کارایی و وردی و ڕوونییەوە، ئەمەش دەبێتە هۆی بەهێزکردنی تەواوی پرۆسەی بەڕێوەبردنی مووچە لە سەرجەم دامودەزگاکانی حکوومەتدا.
سەبارەت بە گرنگیی ئەم دەستپێشخەرییە ستراتیجییە، سەرۆک وەزیران مەسرور بارزانی ئاماژەی بەوە دا “ڕاگەیاندنی سیستەمی دیجیتاڵیی بەڕێوەبردنی مووچە وەرچەرخانێکی گرنگە بۆ هەرێمی کوردستان؛ بە پشتبەستن بە پێناسی دیجیتاڵی دەتوانین ژێرخانێکی بەهێز ئامادە بکەین بۆ ئەوەی کەرتی گشتی کاراتر، ڕوونتر و پارێزراوتر بێت.”
سیستەمی دیجیتاڵیی بەڕێوەبردنی مووچە دەستپێشخەرییەکی ستراتیجیی حکومەتە بۆ زیاتر بەرەوپێشبردنی پرۆسەی وەرچەرخانی دیجیتاڵی لە هەرێمی کوردستان و لە داتاسەنتەری ناوەندیی حکومەتی هەرێم، کە لەسەر ستانداردی T3ی جیهانی دامەزراوە، جێگیر کراوە تاوەکوو گشت لایەنە پەیوەندیدارەکان بەباشترین شێوە و بەپارێزراویی دەستیان بە خزمەتگوزارییەکانی سیستەمەکە بگات.
یەکێک لە ئامانجە سەرەکییەکانی ئەم سیستەمە بریتییە لە دروستکردنی تاکە سەرچاوەی متمانەپێکراو بۆ بەڕێوەبردنی زانیارییەکانی مووچە، بەمەبەستی باشترکردنی هەماهەنگی و کاری پێکەوەیی نێوان حکومەتی هەرێمی کوردستان و حکوومەتی فیدراڵی لەسەر پرسی مووچە.
سیستەمی دیجیتاڵی بەڕێوەبردنی مووچە لەسەر دەستی لاوانی لێهاتوو و پیشەیی کوردستانەوە لەلایەن فەرمانگەی تەکنەلۆجیای زانیارییەوە داڕێژراوە، کە پابەندبوونمان بە جێبەجێکردنی ستراتیجیی وەرچەرخانی دیجیتاڵی حکومەتی هەرێمی کوردستانەوە دووپات دەکاتەوە.
بۆ دڵنیابوونەوە لە توانا و ئامادەیی بەکارهێنەران لە کارپێکردنی سیستەمەکە، هەزاران کارمەندی دامودەزگا جیاوازەکانی حکومەت ڕاهێنراون و ئامادەکراون بۆ بەکارهێنانی ئەم سیستەمە نوێیە، کە ئەمەش پرۆسەی گۆڕانکاریی و گواستنەوە بۆ قۆناغی نوێ ئاسانتر دەکات.
هاوکات لەگەڵ ئەوەی سیستەمەکە بەردەستە و کاری پێ دەکرێت، فەرمانگەی تەکنەلۆجیای زانیاری کار دەکات بۆ سوودوەرگرتن و شیکارکردنی داتاکانی ئەم سیستەمە بەمەبەستی بڕیاردان لەسەر بنەمای داتا و زانیاری پتەو و فەراهەمکردنی خزمەتگوزاریی دیجیتاڵیی زیاتر، وەکو پۆرتاڵی خزمەتکردنی خودیی مووچەخۆران و ئامرازەکانی هەڵسەنگاندن و بەدواداچوونی کار و چالاکی کە بەشێوازێکی ئاسان دەکرێت تێهەڵکێش بکرێن لەگەڵ ئەم سیستەمەدا.
ئەم بەرەوپێشچوونانە هۆکارێکن بۆ بەسەردەمیکردنی زیاتری کاروبارەکانی حکومەت و باشترکردنی گەیاندنی خزمەتگوزارییەکان بە هاووڵاتییان.
هەروەها، بە سوودوەرگرتن لە تەکنەلۆجیای پێشکەوتوو، فەرمانگەی تەکنەلۆجیای زانیاری پابەندە بە ئەرکەکانی لە پێناو بەدیهێنانی حکومەتێکی شەفاف و کارامە کە تێیدا بایەخی تەواو بە هاووڵاتییان بدرێت.
