مەریوان قەرەنی: كیلابی و ئەوانەی بە دوای كەوتبوون دەزانن لەژێر خێوەتەكەی سلێمانی پرسەی كێ! بەڕێوە دەچێ
ئەندامێكی پەرلەمانی عێراق بە توندی ڕەخنە لە سەردانەكەی یوسف كیلابی، پەرلەمانتاری شۆڤێنیی عێراق بۆ ژێر خێوەتەكەی مانگرتوان لە سلێمانی دەردەبڕێ و رایدەگەیەنێت كە ئەو خێوەتە هێندەی پرسەی بەرەیەكی شكستخواردووە، نیو هێندە گوزارشت لە مانگرتنی بەربژێرە كەڕكەكان ناكات.
مەریوان قەرەنی، ئەندامی پەرلەمانی عێراق لە فراكسیۆنی پارتی، نووسینێكی بە ناونیشانی (كیلابی دەزانێ پرسەی كێ! لە ژێر خێمەكەی سلێمانی بەڕێوە دەچێ!) بڵاو كردەوە و دەڵێت: دوێنێ هەینی ٧ی ٢ی ٢٠٢٥، یوسف كیلابی، پەرلەمانتاری عێراق كە هەموومان دەزانین هەڵوێستی بەرامبەر بە كورد و كوردستان چۆنە و چەندە كەسێكی ناخڕەشە بەرامبەر بە خەڵكی كوردستان، خۆی گەیاندە سلێمانی و سەردانی خێوەتەكەی بەناو مامۆستا و فەرمانبەرانی ناڕازی كرد.
هەروەك ڕوونی كردەوە: ئەوەی بە لای ئێمەوە سەیرە، كیلابی نە نوێنەری خەڵكی كوردستانە، نە لەم چەند ساڵەی رابردوودا بۆ جارێكیش لە پەرلەمانی عێراقەوە قسەیەكی بە خێری بۆ خەڵكی كوردستان كردووە، نە تەنانەت قسەیەكی بەخێری بۆ ئەو (بەناو) مووچەخۆرانەش كردووە كە ماوە نا ماوە خۆیان زەلیلی بەر دەرگای شۆڤێنییەكان دەكەن! ئەی كەواتە كەسێكی ئاوا بچێت بۆ ژێر خێوەتەكەی سلێمانی یان نەچێت چ بەهایەكی هەیە و چ جیاوازییەك دروست دەكات؟ ئنجا بێزەحمەت با كەسێك پێمان بڵێت ئەم كیلابی و شتە چیان بۆ خەڵكەكەی خۆیان كردووە تا بێن خۆیان بەسەر خەڵكی ئێمەوە هەڵبكێشن؟ مەگەر حاڵی ناوەڕاست و باشووری عێراق زۆرجوانە تا ئەمان خۆیان لە خەڵكی كوردستان بكەن بە خەمخۆر؟
هەر لەو نووسینەدا مەریوان قەرەنی راشكاوانە دەڵێت: راستییەكی تاڵ لەم بابەتەدا هەیە، ئەم خێوەتەی لە سلێمانی هەڵدراوە، هێندەی گوزارشت لە پرسە و شینگێڕانی بەرەیەكی شكستخواردوو دەكات كە ئەو بەرەیە هەم لە عێراق و هەم لە وڵاتانی دەوروبەر ڕۆژیان ئاوا بووە (بۆ ئەمەش كیلابی و ئەوانەی بەدوای كەوتبوون باش دەزانن پرسەی كێیە!)، نیو هێندە گوزارشت لە مانگرتنی ئەو چەند مامۆستا و فەرمانبەرانە ناكات كە لە سلێمانی بە (بەربژێری كەڕك) ناویان دەركردووە و هەموو خەڵك دەیانناسێ كە كەسانێكن پێشتر دەست و شانی ئەم و ئەویان ماچ كردووە و خۆیان بەربژێر كردووە كەچی كەمتر لە پەنجا دەنگیان هێناوە!
لە كۆتاییشدا جەختی كردۆتەوە: ئەسڵ ئەوەیە، ئەگەر یوسف كیلابی و ئەوانەشی خۆیان بە پشتیوانی مووچەخۆرانی كوردستان نیشان دەدەن، راستگۆن و بە كردەیی دڵسۆزی مووچەخۆرانی كوردستانن، با لەژێرەوە داوا لە بەغدا نەكەن مووچەی كوردستان ببڕێ و بڕ و بیانوو بۆ وەزارەتی دارایی عێراق نەدۆزنەوە تا ببێتە هۆی نانەوەی كێشە بۆ مووچەخۆران! ئەگەر فیعلەن دەیانەوێ كێشەی مووچە چارەسەر بێت، با پشتیوانیی جێبەجێكردنی ئەو ڕێككەوتنە بن كە لەم دواییە لە نێوان هەردوو حكوومەتی هەرێمی كوردستان و حكوومەتی فیدڕاڵیی عێراقدا كراوە، نەك خەریكی نماییش و موزایەدەكردن بن لەسەر خەڵك!
