بەختیار تاڵەبانی: میلیشیاکان جاران بە مووشەک و درۆن هەولێریان دەکردە ئامانج، ئێستاش بەو گرووپەی خۆیان ناو ناوە مامۆستای ناڕازی!
چاودێرێکی سیاسی پیلانێکی دیکەی میلیشیا تیرۆریستەکان بەرامبەر هەرێمی کوردستان و ئاشکرا دەکات و دەڵێ، لە ڕابردوودا ئەو گرووپانە درۆن و مووشەکیان لە دژی هەرێمی کوردستان و هەولێری پایتەخت بەکار دەهێنا، ئێستاش لە ڕێگای ئەو گرووپەی خۆیان ناو ناوە مامۆستای ناڕازی و مانگرتوو، هەولێر دەکەنە ئامانج.
بەختیار تاڵەبانی، چاودێری سیاسی رایگەیاند : “ئەو گرووپەی لە سلێمانی بە ناوی دەستەی مامۆستایانی ناڕازیەوە کار دەکەن، نەیانشاردووەتەوە پەیوەندیی توندوتۆڵیان لەگەڵ ئەو گرووپە میلیشیایانە هەیە، کە سەر بە هێزە وەلائییەکانن، کە نە دۆستی کوردن و نە دۆستی شاری سلێمانیین، بەئاشکرا دژایەتیی ناردنی مووچەی مووچەخۆرانی هەرێمی کوردستانیان کردووە، بەداخەوە لایەنە فرسەتبازە پۆپۆلیستە ناوەخۆیەکانی کوردستانیش سواری ئەو شەپۆلە دەبن و هەوڵ دەدەن پشکیان لە پڕۆژەی ڕەیان کلدانی و میلیشیاکان هەبێت، بۆ ئەوەی لە هەڵبژاردن سەرنجی خەڵک بەلای خۆیاندا ڕابکێشن و دەنگ کۆ بکەنەوە، حزبەکانی سلێمانی پێیان خۆش بێت یان پێیان ناخۆش بێت، دوای ئەجندای ڕەیان کلدانی و قەیس خەزعەلی کەوتوون.”
گوتیشی: “پەرلەمانتارەکانی سەر بە حەشد و دۆستی گرووپەکەی سلێمانی چوون بۆ ژێر خێمەکە، تاوەکوو هەندێک ئامۆژگاری و ڕێنمایی نوێیان پێ بدەن، بەداخەوە بەشێک لە نوێنەرانی کورد خۆیان بە بچووک دەزانن، هەموویان دوای دوو نوێنەری دژەکوردی شۆڤێنی کەوتوون، کە چەندین جار دژی هاتنی مووچەی مووچەخۆران بوون، وەک ئەوەی سەرۆکی وڵات بن دەستیان لەسەر سینگیان بووە و دوایان کەوتوون، هەموو ئەو پەرلەمانتارانە بە حزبەکانیشیانەوە، خاوەنی نۆ کورسیی پەرلەمانی نیین، لە کاتێکدا ڕێژەی کورد بە چەندین جار لەو ڕێژەیە زیاترە، بەڕاستی جێگای پرسیارە، چی بەو حزب و میلیشیایانە دەکرێت، بە کورد و نوێنەرەکانی ناکرێت.”
دەشڵێ: “دوای ئەوەی ماوەی چەند ڕۆژێک بانگەوازیان کرد بۆ کۆکردنەوەی زۆرترین خەڵک لەدەوری خێمەکە، کاتێک خەڵکی سلێمانی بەدەم داواکارییەکەیانەوە نەچوو، نەیاتوانی ڕۆژی هەینی زۆرترین خەڵک لەدەوری خێمەکە کۆ بکەنەوە، ئاراستەیان گۆڕی بۆ هەولێر، بۆ ئەوەی دەنگدانەوەی خۆپیشاندانەکە زیاتر بێت، تاوەکوو ئەو شکستەی لە ڕۆژی هەینی بەسەریاندا هات پەردەپۆشی بکەن.”
ئەو چاودێرە سیاسیە دەشڵێت: “ئەو چالاکییە پڕۆژەی ڕەیان کلدانی و میلیشیاکانە، بۆ ئەوەی هەرێمی کوردستانیش بکەن بە بەشێک لەو ململانێیە سیاسییەی لە ناوچەکەدا هەیە، ئەوان باش دەزانن لە کاتی گۆڕانکاریی گەورەدا کورد یەکگرتوو بێت دەستکەوتی گەورەی دەبێت، هەروەک چۆن لە ساڵی 1991 و 2003 کورد یەکگرتو بوو، توانی زۆرترین دەستکەوت بەدەست بهێنێت، ئێستاش کە گۆڕانکاریی گەورە لە ناوچەکە ڕوو دەدات، ئەوان هەوڵ دەدەن ئەو یەکڕیزییە تێکبدەن، بۆ ئەوەی کورد وەکوو نەتەوە هیچ دەستکەوتێکی نەبێت و ناسەقامگیری لە هەرێمی کوردستان دروست بکەن.”
