بەشدار بازیانی: نەخۆشییەکی مەترسیدار لە بازیان بڵاو بووەتەوە

ڕۆژنامەنووسێكی سنووری سلێمانی ئەوە ئاشكرا دەكات، كە بەهۆی دوكەڵ و تۆز و پاشماوەی ئەو كارگانەی لە سنووری قەزای بازیاندا هەن، نەخۆشییەكی مەترسیدار بڵاو بووەتەوە و بەوەش ژیانی خەڵكی ئەو ناوچەیە كەوتووەتە مەترسییەوە و لە ئاییندەیەكی نزیكیشدا، ئەو نەخۆشییە بۆ سلێمانی دەگوازرێتەوە.

بەشدار بازیانی، ڕۆژنامەنووس لە لاپەڕی خۆی لە تۆڕی كۆمەڵایەتیی (فەیسبووك) لەژێر ناوی (ئامارێكی مەترسیدار و نەخۆشییەكی ترسناك) بابەتێكی بڵاو كردووەتەوە و نووسیویەتی: “بازیان، هەم خۆی لە مەترسییەکی قورسدایە و هەم سلێمانیشی خستووەتە زۆنی مەترسییەكی گەورە.

لە بابەتەكەیدا، ئاماژەی بەوە داوە، كە بەپێی ئەو بەدواداچوونە تایبەتەی، کە لەماوەی شەش مانگدا لەسەر ژینگەی ناوچەی بازیان کردوومە دەرکەوتووە، کە لە قەزای بازیان نەخۆشییەکی مەترسیدار بڵاوبووەتەوە و بەشێک لە خەڵکی تووشی نەخۆشییەک بوون، کە بۆری هەناسەیانی بەئامانج گرتووە و لە ئاییندەیەکی نزیکدا ئەنجامەکانی دەردەکەون.

ئەو ڕۆژنامەنووسە، نووسیویەتی: بەپێی زانیارییەکانی بەندە، نەخۆشیەکە هاوشێوەیەکە لە ڕەبۆە و سووتانەوەی قورس و بۆڕی هەناسە دەگرێت و لەم ماوەیەدا نزیکەی 70 کەس تووشی بوون، نەخۆشییەکە لە پۆلی سەختەکانە، تاکە هۆکاریش ئەو دوکەڵە سامناک و مەترسیدارەیە، کە (کارگە زەبەلاحەکانی ئەو ناوچەیە دەری دەدەن، کارگەی مەسئوول و بازرگانە دەستڕۆیشتوەکان).

هەروەها نووسیویەتی: کارگەکانی چیمەنتۆ و مس و ئاسن و قوڕقوشم، ڕۆژانە هەزاران تۆن (نەوتی ڕەش، نەفتاو) بەبێ هیچ فلتەرێک و بێ هیچ حیسابکردنێک بۆ ژینگە و سەلامەتیی گیانی خەڵک دەسوتێنن و ڕاستەوخۆش ئەو مادە مەترسیدارانەی نێو دوکەڵەکە دەچێتە سییەکانی دانیشتوانی ئەو ناوچانە و تەنانەت ئەمە مەترسییە لەسەر ژینگەی سلێمانیش.

ئەوەشی خستووەتە ڕوو، بازیان لە ئاییندەیەکی نزیکدا سلێمانی هەراسان دەکات، ئەمە زۆۆۆر مەترسیدارە.