پەرلەمانتارێکی پارتی لەسەر سپیكردنەوەی پارە لێپرسینەوە لە بانكی ڕافیدەین دەكات

پەرلەمانتارێکی پارتی دیموکراتی کوردستان لە ئەنجومەنی نوێنەرانی عێراق لەسەر سپیكردنەوەی پارە لێپرسینەوە لە بانكی ڕافیدەین دەكات و بەفەرمی نووسراوی ئاراستەی بانکەکە کرد.

ئەمڕۆ دووشەممە، سیپان شێروانی، پەرلەمانتاری پارتی دیموکراتی کوردستان لە ئەنجومەنی نوێنەرانی عێراق لە هەژماری خۆی لە تۆڕی كۆمەڵایەتی (ئێكس) لە پەیامێكدا بۆ كۆنگرێسمانی ئەمریكی جۆی وێڵسن (كە داوای لێپێچینەوە لە بانكی ڕافیدەن بەهۆی سپیكردنەوەی پارە دەكات) نووسیویەتی: “پەرلەمانی عێراق دەگاتە ڕاستی بنەڕەتی لەبارەی كێشەی شووشتنەوەی پارە لەلایەن ئەو بانكەوە، لە ماوەی ڕابردووشدا نووسراوی فەرمیمان بۆ بانكی ڕافیدەین ناردووە تاكوو زانیاریمان لەسەر ئەو كێشەیە پێبدات.”

هەروەها ئەو پەرلەمانتارەی پارتی نووسراوە فەرمییەكەی بڵاو كردووەتەوە و لە نووسراوەكەدا هاتووە، بەپێی مادەی 61/دووەم لە دەستوور و مادەی 27 لە یاسای ئەنجومەنی نوێنەرانی عێراق، ژمارە (13)ی بەركاری ساڵی 2018 و مادەی 96 لە پەیڕەوی ناوخۆی ئەنجومەنی نوێنەران، بفەرموون بۆ پێشكەشكردنی خشتەی وردەكاری سەبارەت بە بڕی قەرزە جێگیرەكان بۆ كۆی قەرزەكان لە بانكەكەتان.

لە چەند رۆژی رابردوو ژمارەیەک كۆنگرێسمانی ئەمریكی، لەنێویشیان جۆی وێڵسن، باس لە شووشتنەوەی پارە و ناردنی بۆ گرووپە تیر*ۆر*یستییەكان لەلایەن بانكی ڕافیدەینەوە دەكەن و داوا دەکەن ئەو بانكە بخرێتە لیستی ڕەشەوە.