بەرپرسێكی عێراق چوار ساڵە مووچەی شەهیدانەی خۆی وەردەگرێت
ئەندامی ئەنجومەنی پارێزگای بەغدا، بەناوی ویسام محەمەد دلێمی، لەژێر ناوی مووچەی دەزگای شەهیدان بڕە پارەیەکی زیاتر لە 57 ملیۆن دیناری وەرگرتووە، هەرچەندە هێشتا لە ژیاندایە.
بەپێی نووسراوێكی بەڕێوەبەرایەتی شەهیدانی ئەنبار كە ئاراستەی بەشی سكاڵاكانی فەرمانگەی یاسایی دامەزراوەی شەهیدانی عێراق كراوە و وێنەی سەرجەم بەڵگەنامەكانی هاوپێچ كراوە، دەیسەلمێنێت ویسام محەمەد ئیبراهیم دلێمی، بڕی (57.641.333) دیناری لەو بەڕێوەبەرایەتییە وەك شەهید وەرگرتووە.
دوای لێكۆڵینەوە لە دۆسیەكانی و وردبینی لە ناوی چواری و ناوی دایكی و وردەكاریی دۆسیەكەی، دەركەوتووە كە ویسام دلێمی ناوی خۆی خستووەتە چوارچێوەی لیستی شەهیدانی سنووری پارێزگای ئەنباری دامەزراوەی شەهیدانی عێراق، هەروەها پێشتریش قەرەبووی وەرگرتووەتەوە وەك زیانلێكەوتوویەكی پرۆسەی سەربازییەكانی ئەنبار، پێش ئەوەی مامەڵەی شەهیدانەی خۆی ئەنجام بدات و خۆی وەك شەهید تۆمار بكات.
