بەختیار تاڵەبانی: دەسەڵاتی کارتۆنیی یەکێتی لە کەرکووک ڕەوایەتی بەو ستەمە دەدات، کە لە کورد دەكرێت

چاودێرێکی سیاسیی ڕایدەگەیەنێت، ئەگەر یەکێتی بەشدار نەبێت لەو زوڵم و ستەمەی بەرامبەر کورد دەکرێت لە کەرکووک، بەدڵنیاییەوە بە ڕێککەوتنی هۆتێل ڕەشید و بێدەنگیی دەسەڵاتی کارتۆنیی یەکێتی لە کەرکووک، ڕەوایەتی دەدات بەو زوڵم و ستەمەی لە كورد دەكرێت لە كەركووك و دەورووبەری.

بەختیار تاڵەبانی، چاودێری سیاسی ڕایگەیاند: بەداخەوە ئەمڕۆ دیمەنی زۆر قێزەونی هاوشێوەی ڕژێمی بەعسمان بینی بەرامبەر بە کورد ئەنجام درا، ئەو زوڵم و ستەمەی بەرامبەر بە کورد دەکرێت لە کەرکووک، دەرەنجامی ڕێککەوتنی ژوورە تاریکەکانی هۆتێل ڕەشیدە، کە تێیدا زۆربەی پۆستە گرنگەکان بۆ بەدەستهێنانی پارێزگارێکی بێدەسەڵات، پێشکەش بە عەرەبی سوننە و تورکمان کرا.”

ئاماژەی بەوەش دا: ئەو زوڵم و ستەمەی ئەمڕۆ بەرامبەر بە کورد کرا، قسەکانی ڕەیان کلدانی و وەسفی عاسیی سەلماند، کاتێک بۆ کەناڵەکانی میلیشیاکان باسیان لە ڕێککەوتنی هۆتێل ڕەشید دەکرد و بەئاشکرا دەیانگوت دەسەڵاتی پێکهاتەی عەرەب لە ساڵی 2003ەوە بەم شێوەیە بەهێز نەبووە، هەم لە ژمارەی پۆستەکان و هەم لە گرنگیی پۆستەکان.

ئەو چاودێرە سیاسییە گوتیشی: ئەوەی جێگای نیگەرانییە، دەبینین پارێزگاری کەرکووک کوردە، سەرکۆماری عێراق کوردە و لە ئاست ئەو هەموو زوڵم و ستەم و پێشێلكارییانەی بەرامبەر کورد دەکرێت بێدەنگن، بوونی ئەو هەموو دەسەڵاتە باڵایە لە کەرکووک و عێراق و بێدەنگییان، ڕەوایەتی بەو زوڵم و ستەمە دەدات، کە بەرامبەر بە کورد دەكرێت.

ئەوەشی خستە ڕوو: ئەوەی جێگای سەرسوڕمانە، هەر ئەمڕۆ لە کاتی هێرشکردنە سەر جووتیارانی کورد، پارێزگاری کەرکووک لە پردێ بووە، بەڵام بێدەنگیی هەڵبژاردووە و بۆ چارەسەرکردنی کێشەکان نەچووەتە شوێنی ڕووداوەکە، لە هەمان کاتدا بەرپرسانی یەکێتی ئامادەن لە ئەمریکا بگەڕێنەوە بۆ ئەوەی سەردانی خێمەی بەناو مانگرتوان بکەن، تەنیا بۆ ئەوەی خۆیان لە شاشەكان پیشان بدەن و موزایەدەیان پێوە بکەن.

بەختیار تاڵەبانی، جەختیشی کردەوە: پێدەچێت بەهۆی ڕێککەوتنەکەی هۆتێل ڕەشید، دەسەڵاتی پارێزگاری کەرکووک سنووردار کرابێت، ئێستا پارێزگاری کەرکووک تەنیا دەسەڵاتی چاودێریکردنی زبڵ و خاشاک و مۆلیدەی گەڕەکەکان و پڕۆژەکانی خزمەتگوزاریی هەیە، کەچی بەپێی یاسا، پارێزگاری کەرکووک سەرۆکی لێژنەی ئەمنیی پارێزگایە و نابێت بەبێ ئەو هێز بۆ ناوچەیەکی دیاریکراو بجووڵێندرێت، بەڵام دەبینین لەکاتێکدا یاسای هەڵوەشانەوەی بڕیارەکانی دادگای سەوڕە لە پەرلەمانی عێراق دەرچووە، بە بێ هیچ پاساوێک زوڵم و ستەم بەرامبەر بە کوردی کەرکووک بەردەوامە.