مەسرور بارزانی پیرۆزبایی لە یەکێتی قوتابیان و یەکێتی لاوانی دیموکراتی کوردستان دەکات

جێگری سەرۆکی پارتی دیموکراتی کوردستان، پیرۆزبایی حەفتا و دووەمین ساڵیادی دامەزراندن لە هەردوو ڕێکخراوی یەکێتی قوتابیانی کوردستان و یەکێتی لاوانی دیموکراتی کوردستان کرد و لەبەشێکی هاتووە: ڕۆڵێکی دیار و کاریگەریان لە بزووتنەوەی ڕزگاریخوازیی کوردستان و خەباتی نیشتمانیی و نەتەوەییمان هەبووە.

مەسرور بارزانی، جێگری سەرۆکی پارتی دیموکراتی کوردستان، لە یادی 18ـی شوبات، حەفتا و دووەمین ساڵیادی دامەزراندنی هەردوو ڕێکخراوی یەکێتیی قوتابیانی کوردستان و یەکێتیی لاوانی دیموکراتی کوردستان، پایەمێکی بڵاوکردەوە و ڕایگەیاند “گەرمترین پیرۆزبایی ئاراستەی مەکتەبی سکرتارییەت و ئەندامانی هەردوو یەکێتیی قوتابیان و لاوانی دیموکراتی کوردستان دەکەم و هیوای پێشکەوتنیان بۆ دەخوازم.”

هەروەها ئاماژەی بەوە کرد “یەکێتیی قوتابیانی كوردستان و یەکێتیی لاوانی دیموکراتی کوردستان، مێژوویەکی درەوشاوەیان لە خەباتی ڕێکخراوەییان و خزمەتکردنی قوتاییان و لاوان و بەرگریکردن لە ماف و داخوازییەکانیان و پەرەپێدانی تواناکانیان هەبووە. هەروەها ڕۆڵێکی دیار و کاریگەریشیان لە بزووتنەوەی ڕزگاریخوازی کوردستان و خەباتی نیشتمانیی و نەتەوەییمان و داکۆکیکردن لە مافەکانی خەڵکی کوردستان و دەسکەوتە نیشتمانییەکان گێڕاوە.”

مەسرور بارزانی لە پەیامەکەیدا گوتی: یەکێتیی قوتابیانی كوردستان و یەکێتیی لاوانی دیموکراتی کوردستان، فێرگەیەکی دەوڵەمەند و سوودبەخشی پێگەیاندنی دەیان سەرکردەی بە توانا و لێهاتووی کوردستانیش بوون و بە شانازییەوە، منیش ئەندام و کادیری قوتابیان و لاوان بووم.

لە کۆتایشدا جەختیشی کردەوە “ئێستاش کە ئەم دوو ڕێکخراوە تێکۆشەرە ،هەوڵەکانیان چڕکردووەتەوە و ئامادەکارییەکانیان تەواو کردووە بۆ یەکگرتنەوە، ئومێدەوارم لە کار و تێکۆشانی خۆیان لە پێناو پێشخستنی خەباتی ڕێکخراوەییان بە شێوازێکی پێشکەوتووتر کە لە ئاست پێشکەوتنەکانی ئەم سەردەمەدا بێت بەردەوام بن و هەمیشە لە بەرەوپێشچوون و پێشەنگبوون و نوێبوونەوە و داهێناندا بن و بە باشترین و پێشکەوتووترین شێوە، خزمەتی نەوەی نوێ و قوتابیان و لاوانی کوردستان بکەن و لەم ڕووەوە، هەموو پشتیوانییەکی خۆمیان بۆ دووپات دەکەمەوە.”