فراكسیۆنی پارتی: ئه‌وه‌ی له سنووری سه‌رگه‌ڕان به‌سه‌ر جووتیاراندا ده‌هێنرێت هه‌ڕه‌شه‌یه له ئاشتی كۆمه‌ڵایه‌تی
فراكسیۆنی پارتی دیموكراتی كوردستان، له‌باره‌ی ئه‌و ده‌ستدرێژیانه‌ی سوپای عێراق بۆ سه‌ر جوتیارانی كورد له سنووری ناحیه‌ی سه‌رگه‌ڕانی سه‌ر به قه‌زای دووبز به‌یاننامه‌یه‌كی بڵاو كرده‌وه رایدەگەیێنێت :” ئه‌وه‌ی له سنووری سه‌رگه‌ڕان به‌سه‌ر جووتیاراندا ده‌هێنرێت هه‌ڕه‌شه‌یه له ئاشتی كۆمه‌ڵایه‌تی
له به‌یاننامه‌كه‌ی فراکسیۆنی پارتی هاتووه، جارێكی تر، جوتیارانی كورد لە ناوچەی سەرگەڕان لە پارێزگای كەركووك، ڕووبەڕووی هێرش و پەلاماری بێپاساو بوونەوە، لە كاتێكدا بە زەبری هێز ڕێ لە كاركردن لە زەوییەكانیان دەگرن، هاوكات لە مامەڵەیەكی سەركوتكارانەدا، كە ڕەنگدانەوەی بەردەوامبوونی سیاسیەتی شۆڤێنییە كە بوونی كورد لە ناوچە كێشەلەسەرەكان بە ئامانج دەگرێ. ئەو كردەوانە پێشێلكارییەكی ئاشكرای دەستووری عێراقە و دەستدرێژییەكی ڕوونە بۆ سەر مافەكانی مرۆڤ و هەوڵێكی ئەنقەستانەیە بۆ سەپاندنی واقیعێكی نوێ لە ڕێی بەكارهێنانی هێز و تۆقاندنەوە.
ئه‌وه‌ش خراوه‌ته ڕوو، سه‌رۆك بارزانی هه‌میشه یه‌كه‌مین به‌رگریكار بووه بۆ به‌ده‌ستهێنانی مافه‌كانی گه‌لی كورد له هه‌موو قۆناغه مێژووه قورسه‌كاندا و هه‌میشه دووپاتی له‌وه كردووه‌ته‌وه كه داگیركردنی خاك و موڵك و ماڵی كورد هه‌رگێز جێگه‌ی گفتوگۆ و سازش نیه، هه‌ر هه‌وڵێك بۆ سیاسه‌تی سه‌ركوتكردن و گۆشه‌گیری بدرێ، ئه‌وا به ئیراده‌یه‌كی پۆڵایین و هه‌ڵوێستێكی یه‌كلاكه‌ره‌وه وه‌ڵام ده‌درێته‌وه، ئه‌و به‌رنامه‌یه‌ی كه سه‌رۆك بارزانی دایناوه بۆ پاراستنی مافه‌كانی كورد و به‌رگرییكردن لێیان له دژی زوڵمه، هه‌مان ئه‌و به‌رنامه‌یه‌یه كه بۆ هه‌میشه له‌سه‌ری ده‌ڕۆین.
هاوكات له به‌یاننامه‌كه‌ی فراكسیۆنی پارتی، ئه‌وه‌ش هاتووه، داوا له حكوومه‌تی عێراق و فه‌رمانده‌ی هێزه چه‌كداره‌كانی عێراق ده‌كه‌ین به‌په‌له جووڵه ده‌ست پێ بكات بۆ وه‌ستانی ئه‌و پێشێلكاریانه و هه‌روه‌ها لێپێچینه‌وه بكرێت له‌گه‌ل ئه‌و كه‌سانه‌ی كه ته‌عه‌دایان كردووه و هه‌روه‌ها داوا له‌سه‌رجه‌م هێزه سیاسییه‌كان و ڕێكخراوه‌كانی بواری مافی ده‌كه‌ین چی له ناوخۆ یان ده‌ره‌وه، هه‌ڵوێستێكی ڕوونیان هه‌بێ له‌مه‌ڕ پێشێلكارییه نایاسایانه‌ی كه هه‌ڕه‌شه له ئاشتی كۆمه‌ڵایه‌تی ده‌كات له كه‌ركووك و ناوچه كوردستانییه‌كانی تر.
هه‌ر له به‌یاننامه‌كه‌دا باس له‌وه‌ش كراوه، له هه‌مان كاتدا ئازایه‌تی جووتیاران به‌رز ده‌نرخێنین كه وێڕای فشار و هه‌ڕه‌شه‌كان خاكه‌كه‌یان جێنه‌هێشت و دووپاتی ده‌كه‌ینه‌وه كه ئه‌وان به ته‌نیا نیین، سه‌رۆك بارزانی و هه‌موو هێزه به‌رگریكاره‌كان له‌گه‌ڵ ئه‌و جووتیارانه‌دان و ڕێگه به‌هێچ پیلانێك نادرێ كه ئه‌و جووتیارانه بكرێنه ئامانج و مافه‌كانیان بخورێت. سیاسیه‌تی سه‌ركوتكردن كه له دژی گه‌له‌كه‌مان له رابردوودا په‌یڕه‌و ده‌كرا ناگه‌ڕێته‌وه و هه‌موو هه‌وڵێك ده‌ین كه گه‌له‌كه‌مان بگاته مافه ڕه‌واكانی خۆی و له‌سه‌ر خاكه‌كه‌ی خۆی به ئازادی بژیت.
