داوا دەکرێت پشكی هەرێمی كوردستان لە بودجەی گشتی عێراق زیاد بكرێت.

سەرۆکی فراکسیۆنی پارتی ئاشکرای کرد،” داوامان کردووە پشكی هەرێمی كوردستان لە بودجەی گشتی عێراق زیاد بكرێت و، 12.67% بۆ كوردستان دیاری كراوە، سەرژمێرییش دەڵێ ڕێژەكە نزیكەی 15%یە.

د. ڤیان سه‌بری، سەرۆکی فراکسیۆنی پارتی دیموکراتی کوردستان رایگەیاند : “دوای ڕاگەیاندنی ئەنجامی کۆتایی سەرژمێریی گشتیی دانیشتوان، ژمارە و ڕێژەی دانیشتوانی هەرێمی کوردستان لە عێراقدا بەدیار كەوت، کە ڕێژەکە نزیکە لە %15ـی دانیشتوانی وڵاتەکە پێک دەهێنێت و پێویستە پشکی هەرێمی کوردستان لە بودجەی عێراق زیاد بکرێت، چونکە عێراق لە یاسای بودجەدا پشكی هەرێمی کوردستانی بە 12.67% دیاری کردووە.“

ئه‌وه‌شی خسته‌ ڕوو: ”نووسراوی فەرمیمان ئاراستەی محەمەد شیاع سوودانی، سەرۆكوەزیرانی عێراق کرد و داوامان كردووە، پشكی هەرێمی کوردستان لە خشتەكانی بودجە بۆ ساڵی 2025، پشت بە ئەنجامی سەرژمێریی گشتی ببەستێت، ئەمەش پاڵپشت بە بڕگەی سێیەمی ماددەی 121ـە لە دەستووری عێراق.“