عەلی رەشید: عەلی حەمەساڵح بێ بەڵگە و بۆ كۆكردنەوەی لایك و كۆمێنت قسە دەكات
سەرۆكی ئەنجومەنی پارێزگای هەولێر، قسەكانی عەلی حەمەساڵح، پەرلەمانتاری كوردستان رەت دەكاتەوە و رایدەگەیەنێت كە بەبێ بەڵگە زانیاریی درۆی خستووەتە ڕوو.
عەلی رەشید، سەرۆكی ئەنجومەنی پارێزگای هەولێر (یەكێكە لەو دامەزراوانەی كوردستان كە لە لایەن دادگای فیدڕاڵییەوە بڕیاری هەڵوەشاندنەوەی دراوە) رایگەیاند: ئەمڕۆ سێشەممە 4ی ئاداری 2025، عەلی حەمەساڵح پرێس كۆنفرانسێكی كرد و بانگەشەی ئەوەی كرد گوایە داوا لە خاوەن مۆلیدەكان كراوە پارەیەكی زیاتر لە نرخی راستەقینە بخەنە سەر نرخی هەر ئەمپێرێكی مۆلیدە.
ڕوونیشی كردەوە: ئەم قسانەی عەلی حەمەساڵح سەرلەبەریان درۆ و ناڕاستە و قسەفڕێدانێكی بێمانایە و لەپێناو لایك و كۆمێنتە، ئەگینا با بە بەڵگە قسەكانی خۆی بسەلمێنێت.
هەروەك جەختی كردەوە كە پرۆسەی دیاریكردنی نرخی مۆلیدە پرۆسەیەكی هەڕەمەكی نییە، بەڵكوو لە ئەنجامی بەراوردكردنی كاتژمێرەكانی پێدانی كارەبا و نرخی سووتەمەنی و ئەم جۆرە وردەكارییانەوە دیاری دەكرێت.
گوتیشی: پرۆسه‌ی كارەبای 24 كاتژمێری به‌رده‌وام ده‌بێت، هەرچەندە هەندێك خه‌ڵك و لایه‌نی سیاسی له قازانجیان نییه و موزایه‌ده‌ی پێوه ده‌كه‌ن و دژایەتی دەكەن، چونكە دەیانەوێ خەڵك كێشەی كارەبایان هەبێ و مۆلیدە لەناو هەولێر بمێنن تا بەیانی بڵێن ئەها خەڵكی هەولێر كێشەی كارەبایان هەیە یان بڵێن ژینگەی هەولێر پیسە!
ئەوەشی دووپات كردەوە كە كاتی ئەوە هاتووە مۆلیدەی گەڕەكەكان كەم بكرێنەوە، چونكە جگە لەوەی ژینگە پیس دەكەن، سیمایه‌كی ناشرینیشیان هەیە و وایەریان زۆرە و كارەبایەكی بە كوالێتی خراپ بە خەڵك دەدەن و لە بەرامبەردا نرخەكەشی بەرزە، بۆیە خەڵك لە مۆلیدە زەرەر دەكەن و لە كارەبای 24 كاتژمێری قازانج دەكەن.
