سەدان ملیار دۆلاری عێراق بە گەندەڵی براوەتە دەرەوە و ئەمریكاش ئاگاداری ورد و درشتی ئەو پارانەیە، بەڵام
ئەمڕۆ شەممە 8ی ئازاری 2025 عەدنان تەمیمی، شڕۆڤەكاری سیاسی و ئابووریی عێراقی رایگەیاند، واشنتۆن لە عێراق پەیوەندی بە بەرەنگاربوونەوەی گەندەڵی و چاکسازییەوە نییە، بەڵام “نهێنیی سندووقی ڕەشی” لەلایە.
تەمیمی لە لێدوانێکدا بۆ (بەغداد ئەلیەوم) روونی كردووەتەوە، ئەجێندای ئەمریکا لە عێراق ڕوونە، بەرەنگاربوونەوەی گەندەڵی، یان ئەنجامدانی چاکسازی لە بەڕێوەبردنی دامەزراوەکانی دەوڵەت نییە، بەڵام (نهێنیی سندووقی ڕەشی لە لایە)، كە ڕەنگە تاکە دەوڵەت بێت دەتوانێت نهێنیی پارەی دزراو و لەبیرکراوەکانی عێراق لە بانکەکانی پایتەختی وڵاتاندا بزانێت، کە ئەحمەد چەلەبی، پێش كۆچی دوایی ئاشکرای کردووە، کە بە لانی کەمەوە دەگاتە زیاتر لە 300 ملیار دۆلار.
تەمیمی ئاماژەی بەوەش کردووە، ڕێڕەوەکانی فشاری ئەمریکا لەسەر عێراق پەیوەندیی بە سێ دۆسیەی سەرەکییەوە هەیە، کە بریتین لە قاچاخیكردن بە دۆلار، دۆسیەی گرووپە چەکدارەکان و چەکدارکردنیان و خاوەندارێتیی توانای فڕۆکەی بێفڕۆکەوان، لەگەڵ توانا و زاڵبوونی ڕژێمی ئێران بەسەر هەندێک لە ناوەندەکانی بڕیاردان لە عێراقدا.
ئەو شڕۆڤەكارە دەڵێت، بڕینی پەیوەندیی دارایی و ئابووری لەنێوان بەغدا و تاران کارێکی قورسە، بەتایبەتی کە بازرگانیی سوودبەخشە بۆ هەردوو لا و هیچ جێگرەوەیەك نییە بۆ زۆر لەو کەرتانەی پشتگیریی بازاڕەکانی عێراق دەکەن.
دەشڵێت، ئەمریکا فشار دەخاتە سەر بەغدا بۆ کەمکردنەوەی هاوکاریی دارایی و ئابووری لەگەڵ تاران، بە ئامانجی فشارخستنە سەری لە دۆسییەی ناوەکیدا بە شێوەیەکی ڕاستەوخۆ، ئەوەش بەوهۆیەوەیە، نیگەرانییەک هەیە لای ئیدارەی ئەمریکا بە فشاری لۆبی ئیسرائیلی بۆ کۆتاییهێنان بە خواستی ئێران بۆ خاوەندارێتیی چەکی ناوەکی، چونكە بەوە تاران هاوسەنگییەک لە هێز لە ڕۆژهەڵاتی ناوەڕاستدا دروست دەکات، کە تەل ئەبیب ئەوەی ناوێت.
