ئەنجومەنی وەزیران لێخۆشبوونی لە قیستەکانی قەرزی بچووک کە سوودمەندەکانیان کۆچی دواییان کردووە، پەسەند کرد

سەرۆک وەزیران وەزارەت و دامەزراوەکانی ڕاسپارد هەرچی زووە لیستی مووچەی مانگی ئادار ئامادە بکەن. هاوکات، ئەنجوومەنی وەزیران لێخۆشبوونی لە قیستەکانی سوودمەندانی قەرزی بچووک لە ساڵانی پێشوو کە سوودمەندەکانیان کۆچی دواییان کردووە، پەسەند دەکرد. 
چوارشەممە، 12ی ئاداری 2025، بە سەرپەرشتيی سەرۆک وەزیران مەسرور بارزانی و ئامادەبوونی قوباد تاڵەبانی، جێگری سەرۆک وەزیران، ئەنجوومەنی وەزیرانی هەرێمی کوردستان کۆ بووەوە.

بە گوێرەی ڕاگەیەنراوی کۆبوونەوەکە “لە سەرەتای کۆبوونەوەکەدا، سەرۆکی ئەنجوومەنی وەزیران بە ناوی ئەنجوومەنی وەزیرانەوە، وەزارەتی دارایی و ئابووری ڕاسپارد بۆ ئامادەکردنی خشتەی دابەشکردنی مووچەی مانگی شوباتی مووچەخۆرانی هەرێمی کوردستان، ئەویش دوای ئەوەی ئەمڕۆ چوارشەممە، 12-03-2025، بڕی نزیکەی 958 ملیار دینار وەک مووچەی مانگی شوبات خرایە سەر هەژماری وەزارەتی دارایی و ئابووريی هەرێمی کوردستان، بڕیاریش درا هەر لە سبەینێوە دەست بە دابەشکردنی بکرێت. لە هەمانکاتدا سەرجەم وەزارەت و دامەزراوەکانیش ڕاسپێردران هەرچی زووە لیستی مووچەی مانگی ئادار ئامادە بکەن، بۆ ئەوەی بۆ وەزارەتی دارایيی فیدڕاڵ بنێردرێت، بۆ خەرجکردنی مووچەی مانگی ئادار پێش پشووەکانی جەژنی پیرۆزی ڕەمەزان.”

هەناردەکردنەوەی نەوتی کوردستان

بڕگەی یەکەمی کۆبوونەوەکە تایبەت بوو بە تاوتوێکردنی هەناردەکردنەوەی نەوتی کوردستان. لە ڕاگەیەنراوەکەدا هاتووە “کەمال محەممەد ساڵح، وەزیری سامانە سروشتییەکان بە وەکالەت، دوا پێشهاتەکانی کۆبوونەوە هاوبەشەکانی نێوان وەزارەتی سامانە سروشتییەکان و وەزارەتی نەوتی فیدراڵی بە ئامادەبوونی نوێنەری کۆمپانیا نەوتییەکان خستەڕوو. لەم بارەوە وەزیری سامانە سروشتییەکان بە وەکالەت، تیشکی خستە سەر ئەنجامی گفتوگۆ و هەوڵەکانی دەستپێکردنەوەی هەناردەکردنی نەوتی هەرێمی کوردستان لەبەر ڕۆشنایيی بڕگەکانی یاسای بودجەی فیدراڵ.”

ئاماژە بەوە کراوە “ئەنجوومەنی وەزیران وێڕای دەستخۆشی لە هەوڵەکانی وەزارەتی سامانە سروشتییەکان لەپێناو زوو دەستپێکردنەوەی هەناردەی نەوتی هەرێمی کوردستان و کارکردنی هاوبەش لەگەڵ وەزارەتی نەوتی عێراقی فیدڕاڵ بۆ چارەکردنی گرفت و ئاستەنگەکانی بەردەم پرۆسەکە و تەواوکردنی پێداویستی و ڕێکارەکانی هەناردەکردن، لە هەمانکاتدا جەختی لە هەڵوێستی نەگۆڕی حکوومەتی هەرێم کردەوە بۆ جێبەجێکردنی هەمواری یاسای بودجە بە ئاراستەی هەناردەکردنەوە و فرۆشتنی نەوتی هەرێم لە ڕێگای کۆمپانیای سۆمۆ و گەڕانەوەی داهاتەکەی بۆ وەزارەتی دارایی فیدڕاڵ، ئەمەش لە دوای تەواوکردنی ڕێکار و پێداویستیيەکانی پرۆسەکە کە ئێستا هەر دوو وەزارەت و کۆمپانیا نەوتییەکان بە هاوبەشی کاری لەسەر دەکەن.”

دوو پێشنیازەکەی وەزارەتی کار و کاروباری کۆمەڵایەتی

بڕگەی دووەمی کارنامەی کۆبوونەوە، تایبەت بوو بە گفتوگۆکردن لەبارەی دوو پێشنیار کە لەلایەن کوێستان محەمەد، وەزیری کار و کاروباری کۆمەڵایەتی خرایەڕوو، سەبارەت بە لێخۆشبوون لە پێشینەی هاوسەرگیریی خاوەن پێداویستيی تایبەت کە پێش ساڵی 2013 ئەو پێشینەیەیان وەرگرتبوو. هەروەها لێخۆشبوون لە قیستەکانی ماوە بۆ سوودمەندانی قەرزی بچووک لە ساڵانی پێشوو کە بۆ پڕۆژەی مامناوەمد ئەو قەرزانەیان وەرگرتبوو، بەڵام ئەو سوودمەندانە کۆچی دواییان کردووە.

ئەنجومەنی وەزیران بە کۆی دەنگ هەردوو پێشنیاری وەزارەتی کار و کاروباری کۆمەڵایەتی پەسەند کرد، هەردوو وەزارەتی دارایی و ئابووری و کار و کاروباری کۆمەڵایەتی ڕاسپێردران بە دەرکردنی ڕێنمایيی پێویست بۆ ئاسانکاریی جێبەجێکردنی ئەم بڕیارە.

یاریکردنی ڕۆژەکانی پشوو و بۆنە فەرمییەکان

لە بڕگەی کۆتاییدا، گفتوگۆکردن بوو لەبارەی دیاریکردنی ڕۆژەکانی پشوو و بۆنە فەرمییەکان لە ڕۆژمێری حکومەتی هەرێمی کوردستان، کە لەلایەن جووتیار عادل، سەرۆکی فەرمانگەی میدیا و زانیاری خرایەڕوو، ئەنجومەنی وەزیران لە دوای گفتوگۆ و ڕاگۆڕینەوە، لایەنە پەیوەندیدارەکانی ڕاسپارد کە ڕێکاریی یاسایی و تەشریعیی پێویست لەم بارەوە بگرنەبەر.