میدیای ئەڵمانیا: دەیان هەزار کەس لە شاری کۆڵن ئاهەنگی نەورۆزیان گێڕا و هیچ کێشەیەک ڕووی نەدا
دەزگایەکی میدیایی ئەڵمانیا ڕای دەگەیەنێت: ڕۆژی شەممە زیاتر لە 50 هەزار کەس لە شاری کۆڵن کۆ بوونەوە بۆ ئاهەنگگێڕان بەبۆنەی سەری ساڵی کوردی کە ناسراوە بە “نەورۆز”. پۆلیس ڕێژەی بەشداریکردنی لە “دەیان هەزار” كەسدا پشتڕاست کردەوە و ڕاشی گەیاند: “کە هیچ ڕووداوێکی ئەوتۆ ڕووی نەداوە.”
دەزگای میدیایی WDR کە سەرچاوەیەکی سەرەکیی هەواڵی ناوچەیی و نیشتمانییە لە ئەڵمانیا، ئاماژەی بەوە کردووە ڕێژەی بەشداریکردن زۆر زیاتر بوو لە خەمڵاندنی سەرەتایی کە واپێشبینی دەکرا لە 10 هەزار بەشداربوو زیاتر نەبێت. ئەو جەماوەرە زۆرە بووە هۆی ئەوەی پۆلیس لە پاشنیوەڕۆدا بەشێک لە ناوچەی چالاکییەکە دابخەن، بەڵام ئاهەنگەکان بە ئارامی مانەوە و هیچ پشێوییەک ڕووی نەدا. ئامادەبووان ئاڵای کوردستانیان هەڵدا و ئاهەنگیان دەگێڕا و پێکەوە سەمایان دەکرد.”
بەپێی زانیارییەکانی WDR بێت، هێزە ئەمنییەکانی شارەکە بڵندگۆیان بەکارهێناوە بۆ ئەوەی داوا لە ئامادەبووانی ئاهەنگەکە بکەن کەمێک بەربڵاوتر بن بۆئەوەی پاڵەپەستۆ دروست نەبێت و هیچ کەس زیانی پێنەگات، بەڵام لەگەڵ ئەوەشدا هیچ پشێوییەک دروست نەبووە.
هاوکات پۆلیس چاودێریی هێما قەدەغەکراوەکانی کردووە و هەندێک ئاڵا کە وێنەی پەیوەست بە پارتی کرێکارانی کوردستان (پەکەکە)یان لەسەر بووە کە لە ئەڵمانیا قەدەغەیە، دەستی بەسەردا گرتووە، ئەمەش بە هۆکاری ئەوەی کە پەکەکە لە ساڵی 1993ەوە لە ئەڵمانیا قەدەغە کراوە و لە ساڵی 2002ەوە لە لیستی ڕێکخراوە تیرۆریستییەکانی یەکێتیی ئەورووپادایە.
سەرەڕای کەشوهەوای سیاسی و چاودێریی پۆلیس، چالاکییەکە بەبێ هیچ گیروگرفتێکی بەرچاو کۆتایی هات، بەمەش بووە یەکێک لە گەورەترین و ئارامترین ئاهەنگەکانی نەورۆز لە شارەکەدا.
