تازەكردنەوەی تۆماری دەنگدەران دەست پێ دەكات
تازەكردنەوەی تۆماری دەنگدەران لە شارەکانی کوردستان دەست پێ دەكات و، ماوەی مانگێک بەردەوام دەبێت.
نەبەرد عومەر، بەرپرسی هەڵبژاردنەکانی کوردستان لە کۆمیسیۆنی عێراق، لە کۆنفرانسێکی ڕۆژنامەوانیدا ڕایگەیاند، لە هەولێر، دهۆک و سلێمانی دەست دەکەین بە نوێ کردنەوەی بایۆمەتری لەماوەی مانگێک تاوەکو ئەوانەی ڕێکەوتی لە دایکبوونیان دەکەوێتە ساڵی 2007، بتوانن سەردانی بنکەکان بکەن، تاکو کارتی هەڵبژاردن دەربهێنن.
نەبەرد عومەر دەڵێت: ئەو کەسانەی دەیانەوێت لە پارێزگایەک بۆ پارێزگایەکی دیکە بگوێزنەوە، یاخود بنکەی دەنگدانیان بگۆڕن، بە هەمان شێوە دەتوانن سەردانی بنکەکان بکەن بەمەبەستی گۆڕینی شوێنی دەنگدانیان.
ڕاشیگەیاند، ئەو کەسانەی مردوویان هەیە دەتوان ڕەشکردنەوەیان بۆ بکەن، ناویان لە لیستی تۆماری دەنگدان دەربهێنن. ئەوانەی هێزی ئەمنیین و خانەنشین بوون، یاخود ئەوانەی ناویان بەهەڵە گەڕاوەتەوە، دەتوانن سەردانی بنکەکانمان بکەن و بۆ ڕاستکردنەوەی ناو و گۆڕینی شوێنی نیشتەجێبوونیان.
