ڕێبەر ئەحمەد: حکومەتی ھەرێمی کوردستان پابەندە بە ڕووبەڕووبوونەوەی تاوانی رێکخراو و تۆرەکانی بازرگانیکردن بە مرۆڤ
وه‌زیری ناوخۆی حکومەتی هه‌رێمی كوردستان رایده‌گه‌یه‌نێت، هه‌رێمی كوردستان پابه‌نده به رووبەڕووبوونەوەی تاوانی رێکخراو و تۆرەکانی بازرگانیکردن بە مرۆڤ.
ڕێبەر ئەحمەد وەزیری ناوخۆی حکومەتی ھەرێمی کوردستان له تۆڕی كۆمه‌ڵایه‌تی ئێكس رایگەیاند: “لە لووتکەی ئاسایشی سنوورەکان لە لەندەن پابەندی حکومەتی ھەرێمی کوردستانم بە رووبەڕووبوونەوەی تاوانی رێکخراو و تۆڕەکانی بازرگانیکردن بە مرۆڤ بۆ وڵاتانی بەشداربووی لووتکەکە دووپات کردەوە”.
هەروەها دەشڵێت : “لەگەڵ ھاوبەشە نێودەوڵەتیەکانمان کاردەکەین بۆ ڕووبەرووبوونەوەی تاوانە سنووربڕەکان.”
ئاماژەی بەوەشکردووە، لەماوەی دوو رۆژی لووتکەی ئاسایشی سنوورەکان دەرفەتی ئەوەی ھەبووە لەگەڵ چەندین ھاوتای خۆی لە وڵاتانی ئەوروپی کۆ ببێتەوە و باسیان له پتەوکردنی پەیوەندییەکانیان و ھەماھەنگی نێوان حکومەتی ھەرێمی کوردستان و وڵاتان و به‌هێزكردنی ئاسایشی سنوورەکانیان کردووە.
بۆ کەمکردنەوەی دەرفەتەکانی تاوان بۆ قاچاخچیی کۆچبەران و گرووپەکانی تاوانی ڕێکخراو، وەزیری ناوخۆی باسی چەند هەنگاوێکی کرد و ڕایگەیاند: هەوڵەکانمان بۆ مامەڵەکردن بۆ دۆزینەوەی چارەسەر بۆ کێشە ئابوورییەکان بەردەوامن بۆ ئەوەی هیوا بدەینە گەنجانمان و ڕێگری بکەین لەوەی لە لایەن تۆڕەکانی تاوانەوە یاری بە چارەنووسیان بکرێت. فرە سەرچاوە و هەمەچەشنکردنی ئابووری یەکێکە لە کارە لەپێشینەکانی سەرۆک وەزیران مەسرور بارزانی. هەروەها حکومەتی هەرێمی کوردستان لەنزیکەوە هەماهەنگی دەکات لەگەڵ نووسینگەکانی گەشتیاری بۆ ئەوەی کە ڕێگری بکرێت لە مامەڵە و چالاکیی نایاسایی گەشتکردن.
