سەرۆکی سەنتەرێکی توێژینەوە : عێراق و چەند وڵاتێكی تر نۆرەیان بۆ هەڵوەشانەوە گرتووە
سەرۆکی ناوەندی فەرەنسی بۆ توێژینەوە لەسەر عێراق، له‌باره‌ى دۆخى ئێستاى خۆرهه‌ڵاتى ناوه‌ڕاست و ئه‌گه‌رى هێرشكردنى ئیسرائیل بۆ سه‌ر عێراق و تێوه‌گلانى به‌غدا له جه‌نگى ناوچه‌كه، دەڵێ:” دۆناڵد ترەمپ، سەرۆكی ئەمریكا ئاماده نییه هیچ گه‌ره‌نتییه‌ك به به‌غدا بدات بۆ ڕێگاگرتن له هێرشی ئیسرائیل. زۆر ئەستەمە عێراق بەم سنوورانەی ئێستایەوە بمێنێتەوە و بەم فۆرمەش لە حکومەتدار، ناتواندرێت وڵاتەكە لە هەڵوەشانەوە بپارێزرێت.
سەرۆکی ناوەندی فەرەنسی بۆ توێژینەوە لەسەر عێراق و، نووسەر د. عادل باخەوان، له وتارێكیدا كه له پێگەی تایبه‌تی خۆى له تۆڕی كۆمه‌ڵایه‌تی (فەیسبووك) بڵاوی كردووه‌ته‌وه، نووسیویەتی: “سەرۆکوەزیرانی عێراق دەڵێت، بە مامەڵەی ژیرانە عێراقمان لە چوونە نێو شەڕ دوورخستەوە، بەڵام ئایا بەڕاستی تەواو عێراق لە جەنگە گەورەکە دورخراوەتەوە؟“
ئه‌و نووسه‌ره دەشڵێت:” گه‌ر تا ئێستا سوودانى سه‌ركه‌وتوو بووه له‌وه‌ى عێراق له شه‌ڕى ناوچه‌كه‌دا تێوه‌نه‌گلێت، ئه‌وه یه‌كێك له هۆكاره‌كان ئه‌وه بووه كه ئیدارەکەی جۆ بایدن، سه‌رۆكى پێشووى ئه‌مریكا و هاوڕێکانی نەیاندەویست عێراق لەم جەنگەوە بگلێت و “هاوکاریی سوودانی بوون.“
ئەوەشی خستۆتە ڕوو كە خودى سوودانى باش دەزانێت، ئیدارەی ترەمپ تا ئەم ئێوارەیەش ئامادە نیە هیچ گەرەنتییەك بە بەغداد بدات بۆ ڕێگاگرتن لە پەلامارەکانی ئیسرائیل بۆ سەر ئەو هەشتا ئامانجەی کە دەستنیشانی کردووە.
هەورەها دەشڵێ، بەغدا باش دەزانێت، ئەو هێرشانە دواخراون بۆ پاش دەرئەنجامی دانوستانی نێوان واشنتۆن و تاران کە لە سوڵتاننشینیی عومان دەستی پێکردووە. ده‌شڵێت: “واته ئێستاش بڕیارەكان تەنها لە نێوان دوو کەوانەدان و چاوەڕوانن و هەڵنەوەشاونەتەوە.“
باسی لەوەش كردووە:” عێراق لای ئەمەریکا و ئیسرائیل دۆسیەیەكی سەربەخۆ نییە، وڵاتێکی خاوەن سەروەری نییە تا بە جیا مامەڵەی لەگەڵدا بکەن، بەڵکوو هەمیشە وەک بەشێک لە دۆسیەی ئێران و سەروەریی ئێرانی و پرسی ئێران، مامەڵەی لەگەڵدا دەکەن. هه‌روه‌ك ده‌ڵێت: “عێراق خاوەنی هیچ جۆرە سیستمێکی بەرگریی ئاسمانی و زەمینی نییە بۆ ئەوەی بتوانێت لە ساتەوەختی هێرشەکاندا خۆی بپارێزت و بەرگری لە خۆی بکات.“
پێیشیوایه بەغدا باش دەزانێت کە شکستی دانوستانی نێوان واشنتۆن و تاران، واتە پەلاماردانی ئێران و هەڵگیرسانی جەنگێکی گەورە لە ناوچەکەدا و عێراقیش ڕاستەوخۆ تێوەدەگلێت، چونکە هەم ئێران و هەم ئەمەریکاش ڕازی نابن بێلایەن بێت.
له درێژه‌ى وتاره‌كه‌یدا ده‌نووسێت: “لە ساتەوەختێکی وەهاشدا، زۆر ئەستەمە کە عێراق وەک ئێستا بمێنێتەوە، زۆر ئەستەمە بەم سنوورانەیەوە بمێنێتەوە، زۆر ئەستەمە بەم فۆرمە لە حکومەتداریدا، بێمێنێتەوە”.
له كۆتایی وتاره‌كه‌شیدا نووسیوویەتی : “عێراق، لوبنان، سووریا، یەمەن، سوودان و لیبیا، نۆرەیان بۆ هەڵوەشانەوە گرتووە و هەلومەرجی مانەوەیان تیادا نییە. ئەم هەڵوەشانەوەیە پرۆسێسە و تەنها پێویستی بە کاتە و هیچیتر.“
