سەرۆک بارزانی: ئێزیدییەکان بەهۆی کوردبوون و بیروباوەڕیانەوە جینۆساید کران و ئەفسانەی دا.عش لە شنگال تێکشکێندرا

سەرۆک بارزانی لە دوازدەهەمین ساڵیادی جینۆسایدکردنی ئێزیدییەکان لە شنگال پەیامێکی بڵاوکردەوە و تێیدا ڕایگەیاند، ئەو تاوانەی تیرۆریستانی دا.عش دوازدە ساڵ بەر لە ئێستا لە دژی خوشک و برا ئێزیدییەکان ئەنجامیان دا، ئازارێکە بۆ تاهەتایە لە یادی کوردستانیاندا دەمێنێتەوە و درێژەکراوەی ئەو زنجیرە کارەسات و کۆمەڵکوژییانە بوو کە بە درێژایی مێژوو دژی گەلی کوردستان ئەنجام دراون.

لە پەیامەکەدا سەرۆک بارزانی ئاماژەی بەوە کرد، ئێزیدییەکان بەهۆی كوردبوون، ڕەسەنایەتی و بیروباوەڕی ئایینییانەوە کەوتنە بەر شاڵاوی ڕق و ڕەفتاری نامرۆڤانەی تیرۆریستانی داعش و جینۆساید کران.

دەقی پەیامەکەی سەرۆك بارزانی لە ساڵیادی جینوسایدكردنی ئێزیدییەكان لە شنگال:

بەناوی خودای مەزن و دلۆڤان

ئەو تاوانەی تیرۆریستانی دا.عش دوازدە ساڵ بەر لە ئێستا لە دژی خوشك و برا ئێزیدییەكانمان ئەنجامیان دا ئازارێكە بۆ تاهەتایە لە یادی كوردستانیاندا دەمێنێتەوە. ئێزیدییەكان بە هۆی كوردبوون و ڕەسەنایەتی و بیروباوەڕی ئایینیانەوە كەوتنە بەر شاڵاوی ڕق و ڕەفتاری نامرۆڤانەی تیرۆریستانی داعش و جینۆساید كران. ئەو تاوانەی لەسەر دەستی دا.عش لە دەڤەری شنگال ئەنجام درا درێژەكراوەی ئەو زنجیرە كارەسات و كۆمەڵكوژی و تاوانانە بوو كە بە درێژایی مێژوو دژی گەلی كوردستان ئەنجام دراون.

لە دوازدەهەمین ساڵیادی ئەو كارەساتەدا، سڵاو بۆ گیانی شەهیدان و قوربانیانی ئەو تاوانە، سڵاو بۆ دلێری و چاونەترسیی ئەو پێشمەرگە قارەمانانە كە لەسەر چیای شنگال مانەوە و ڕێگەیان نەدا دەستی تیرۆریستان بە چیای شنگال بگات، سڵاو بۆ وەفا و ئازایەتیی هەموو ئەو پێشمەرگە قارەمانانە كە بۆ شكاندنی ئابڵۆقەی چیای شنگال و ئازادكردنی شاری شنگال خوێنیان بەخشی و ئەفسانەی دا.عشیان تێكشكاند. هەروەها پڕ بە دڵ سوپاسگوزاریی خۆمان ئاڕاستەی هەموو تاکێکی سەربەرزی کوردستان دەکەین، کە وەک یەک جەستە هاوسۆز و هاوخەمی خوشک و برایانی ئێزیدی بوون، لەگەڵ ڕێز و سوپاسی زۆرمان بۆ هێزەکانی هاوپەیمانان کە ڕۆڵی دیاریان بینی لە یارمەتیدانی پێشمەرگە و پاشەکشەپێکردن و تێکشکاندنی تیر.ۆریستاندا.

لە یادی ئەو كارەساتەدا بۆ خوشك و برایانی ئێزیدی دووپاتی دەكەمەوە كە بە هەموو توانایەك پشتیوانی خواست و داواكارییەكانیانم. داواشیان لێ دەكەم لەپێناو مسۆگەركردنی دواڕۆژی گەش، لەناوخۆیاندا یەكڕیز بن و هیوایان بە پاشەڕۆژ هەبێت. بێگومان، ئەو دۆخە سەپێنراو و نائاساییەی لە شنگالدا هەیە، تا سەر نابێت و دەبێت خوشک و برا ئێزیدییەکانمان بە سەربەرزییەوە بگەڕێنەوە سەر زێدی باب و باپیرانیان و قەرەبووی زیان و ئازارەكانیان بكرێت.

هەزاران سڵاو لە گیانی پاكی شەهیدانی شنگال و هەموو شەهیدانی ڕێگەی ئازادیی كوردستان

مسعود بارزانی

3ی ئابی 2026