مەسرور بارزانی: بەسەدان پێشمەرگە خوێنی خۆیان كردە قوربانی بۆ پاراستنی شەرەف و كەرامەتی خوشك و برا ئێزیدییەكانمان
به ئامادهبوونی مهسرور بارزانی، سهرۆكی حكومهتی ههرێمی كوردستان، ڕێورهسمی جینۆسایدی شنگال بهڕێوه دهچێت. سهرۆكی حكوومهت له ڕێورهسمهكهدا گوتارێكی پێشكهش كرد و ڕایگهیاند،
دەقی گوتارەکەی سەرۆكی حكومەت:
بە سەربڵندییەوە ئێمە لە خزمەتی جەنابی سەرۆك گەیشتینە شنگال و ئەم دەڤەرە بە شێوەیەكی گشتی ڕزگار كرا، بەڵام ئەم تاوانە لەبیر نەكرا. بە هەزاران خوشك و برای ئێمەی ئێزدی بوونە قوربانیی ئەم جینۆسایدە، بەشیكیان بە دیل گیران و بەشێكیشیان كۆمەڵكوژ كران. لەو ڕۆژەوە تا ئەمڕۆ كابینە یەك لە دوای یەكەكانی حكومەت بەردەوام بوون بۆ ئەوەی بگەڕێن بۆ دیتنەوەی ئەو قوربانییانە و تا ئێستا زیاتر لە 3 هەزار و 500 خوشكی ئێمە دۆزراونەتەوە و رزگار كراون لە دەست ئەو تاوانبارانە، بەڵام زیاتر لە 2 هەزار و 700 كەسی دیكە هێشتا ماون و نەدۆزراونەتەوە. هیوای ئێمە ئەوەیە هەر كەسێك بیەوێت هاوكاریی ئێمە بكات، پێكڕا ئێمە بتوانێت ئەو كەسانە بدۆزینەوە و رزگار بكەین.
جێی خۆیەتی كە من سوپاسی هاوپەیمانان بكەم بۆ ئەو هاوكاری و پشتیوانییەی ئەوان كردیان لە تێكشكاندنی تیرۆریستانی داعش و هاوكاریكردنی ئێمە بۆ ئەوەی ئێمە زیاتر خزمەتی خوشك و برایانی ئێزدی بكەین، ئەوانەی ئاوارە كران و جێی خۆیان بەجێ هێشت و هاتنە كوردستان و گەلێكیشیان ڕوویان كردە دەرەوەی هەرێمی كوردستان و گەیشتنە وڵاتانی دەرەوە و ئەورووپا.
هەموویان دەرگەی خۆیان بۆ ئەو خوشك و برایانە كردەوە، بەڵام هیچ جێیەك نابێتە ماڵی مرۆڤ و چ جێ نابنە واری مرۆڤ، بەڵام لە جێی خۆیەتی كە من سوپاسی هەموو ئەو دەوڵەتانە بكەم كە هاریكاریی ئێمەیان كرد، هەموو رێكخراوە ناحكوومییەكان بكەم كە هاریكاریی ئێمەیان كرد، بە تایبەتیش سوپاسی خەڵكی كوردستان بكەم كە هەموویان دەرگەی خۆیان بۆ ئەو خوشك و برایانە كردەوە. بە داخەوە هێشتا زیاتر لە 20 هەزار ماڵی ئاوارەی ئێزدی لە كەمپاندا دەژین، هەرچەندە مرۆڤ لە وڵاتی خۆیدا ئاوارە نییە، بەڵام كاتێك مرۆڤ لەسەر ماڵ و حاڵی خۆی هەستا، بێگومان ژیانی مرۆڤ بە زەحمەتتر دەكەوێت. هیوای ئێمە ئەوەیە كە ئێمە ڕۆژێك بتوانین ئەوانە بە سەربڵندی بگەڕێنینەوە بۆ جێی خۆیان بۆ شنگال و بۆ هەموو ئەو گوند و دەڤەرانەی كە ناچار بوون كۆچی لێ بكەن.
ئێمە سوپاسی دەسەڵاتی حكومەتی عێراقیش دەكەین بۆ هاریكاریكردنیان لە دۆزینەوەی گۆڕە بەكۆمەڵەكان، بۆ هاریكاریكردنیان لەگەڵ حكوومەتی هەرێمی كوردستان بۆ گواستنەوەی ڕووفاتی ئەوانە بۆ زێدی خۆیان. بەڵام ئێمە هێشتا داواكاریمان هەیە. داواكاریمان ئەوەیە كە حكوومەتی فیدرالی هاریكار بێت بۆ ئەوەی شنگال جارێكی دیكە دۆخەكەی ئاسایی ببێتەوە، خەڵكی شنگال بە سەربڵندی بگەڕێنەوە بۆ جێی خۆیان، ئەمنیەت و ئاسایش و بەڕێوەبردنی ئیدارەش شنگالیش بۆ خەڵكی شگال بگەڕێتەوە. ئێمە ئەو داخوازییەمان لە حكوومەتی فیدرالی هەیە و حكومەتی هەرێم بەردەوام دەبێت بۆ ئەوەی جارێكی دیكە هەم شنگال و هەم دەوروبەری شنگال ئاوەدان بكرێن.
ئێمە زۆر هەوڵمان دا لە كاتی خۆیدا لەگەڵ نەتەوە یەكگرتووەكان، بە تایبەتیش لەگەڵ (یونیتاد) كە دادگایەكی تاوان لە دژی داعش دروست بكرێت بۆ دادگاییكردنی ئەو كەسانەی كە ئەم تاوانانەیان لە دژی خوشك و برایانی ئێمەی ئێزدی ئەنجام دا، بەڵام بەداخەوە حكوومەتی پێشوو هاریكار نەبوو. هیوای ئێمە ئەوەیە كە ڕۆژێك ئەم دادگایە دابمەزرێت و هەر كەسێك دەستی لەم تاوانە هەبێت، بە سزای خۆی بگات.
داوای ئێمە لە کۆمەڵگەی نێودەوڵەتی ئەوەیە كە هاوكار بن هێندەی مومكین بێت بۆ كەمكردنەوەی ئێش و ئازاری قوربانییانی دەستی تیرۆر بە تایبەت خوشك و برایانی ئێمەی ئێزدی. ئەوەی لە دەست ئێمە هات، كردمان و بەردەوامیش بووین. بە تایبەتی ئەو خوشك و برایانەی رزگار كراون، ئەو خوشكانەی دۆزراونەتەوە و ڕزگار كراون، ئێمە بە ناوی حكوومەتی هەرێم دەرماڵەیەكمان بۆ تەرخان كردوون تاوەكوو بەشێك لە ئێش و ئازاری ئەوان كەم بكرێتەوە، هەرچەندە ئەوە هیچ نییە دەرهەق بەو هەموو خەسارەت و غەدر و زوڵمەی كە بەرامبەر ئەوان كراون، بەڵام ئەوەندەی لە دەستمان بێت، ئێمە ئامادەین و بەردەوامیش دەبین.
ئەو قوتابییانەی لە زانكۆكان ویستوویانە بەردەوام بن لە خوێندن، ئێمە زەمالەی خوێندنمان بۆ دەستنیشان كردوون و پێمان داون، زۆر لەوان لە زانكۆكان دەرچوون و ئێستا جێی ئەوانیش دیارە.
جارێكی دیكە دەڵێم پێویستە ئێمە پێكڕا كارێكی وا بكەین كە ئەم تاوانانە دووبارە نەبنەوە، نە بەرامبەر خوشك و برایانی ئێمەی ئێزدی، نە دەرهەق بە خوشك و برایانی ئێمەی كریستیان، نە دەرهەق خوشك و برایانی ئێمەی موسوڵمان، تیرۆر نە دین دەناسێت و نە نەتەوە دەناسێت، تیرۆر دژ بە مرۆڤایەتییە. لەبەر ئەوە هاریكاری و پشتیوانیی هەموان لازمە ئێمە پێكڕا كار بكەین بۆ ئەوەی جارێكی تر تیرۆر لە عێراق سەر هەڵنەداتەوە و یەكێك لەو ڕێگایانەی كە وا دەكات ڕێگریی لە سەرهەڵدانی تیرۆر بكات، ئەوەیە كە دادپەروەری هەبێت، یەكسانی هەبێت، ڕێز لە مافی هەموو ئایین و نەتەوەیەك بگیرێت.
ئێمە وەك حكومەتی هەرێمی كوردستان بەردەوام دەبین لەگەڵ هەموو دۆستانی خۆمان كار بكەین، بە تایبەتی لەسەر ئاستی حكوومەتی فیدڕالیش تاوەكوو جارێكی تر توندوتیژی نەگەڕێتەوە ئەم وڵاتە. میللەتی ئێمە ماندوو بووە، ئێمە پێویستیمان بە پشوودان هەیە، پێویستیمان بە پێشوەچوونە، پێویستیمان بەوەیە كە منداڵەكانی ئێمە دڵنیا بن لەوەی داهاتوویەكی گەشتر چاوەڕێی ئەوانە. ترسی كوشتن و گرتن و رفاندن نابێ چیتر لە وڵاتی ئێمە بمێنێت. داوا لە هەموو دۆستانی خۆمان دەكەین، دەستی خۆیان بدەنە دەستمان بۆ ئەوەی هاریكار بین و كۆتایی بەم مەترسییە بهێنین و كۆتایی بەم تاوانانە بهێنین.
جارێكی دیكە داوا لە حكومەتی فیدڕاڵی دەكەم، هاریكار بن بۆ جێبەجێكردنی ڕێككەوتنی شنگال تاوەكوو هەم خەڵكی ئێمە بە سەربڵندی بگەڕێتەوە باژێڕ و گوندەكانی خۆیان، هەم خەڵكی ئێمە بە سەربڵندی بگەڕێتەوە شار و گوندەكانی خۆیان، هەم ژیانی ئەوان تەئمین بكرێت و قەرەبووی ئەو هەموو تاوان و ناهەقییە بكرێتەوە كە دەرهەق بەو خەڵكە كران.
جارێكی دیكە سوپاسی ئامادەبوونی ئێوە دەكەم. بیرهێنانەوەی ئەم تاوانە و ئەم جینۆسایدە، نابێت تەنیا مەراسیمێك بێت بۆ رۆژێك، بەڵكوو پێویستە ئەمە سۆزێك بێت بۆ ئەوەی ئێمە هەموو پێكڕا خەبات بكەین و تێبكۆشین، پێكڕا كار بكەین تا كۆتایی بەو نەهامەتییانە بهێنین و ژیانێكی سەربەرز بۆ هەموو خوشك و برایانی ئێمەی ئێزدی و هەموو خەڵكی كوردستان و عێراق بگەڕێنینەوە.
جارێكی دیكە سوپاسی ئێوە هەمووتان دەكەم، هەر سەربڵند و سەرفراز بن، كوردستانمان هەر ئاوەدان بێت.