سێ ساڵە خانووی كرێچیەكان لەهەولێر تەواو نەكراوە خەڵك داوای پارەی خۆی دەكاتەوە

خواكوڕك 

پاش ئەوەی پارێزگای هەولێر پرۆژەیەكی 6500 خانووی بۆ كرێچیانی راگەیاند، بەناوی گوندی كۆڕی، بۆ ماوەی سێ ساڵە ئەم پرۆژەیە تەواو نەكراوە، ئەمەش نارەزایەتی تووندی لێكەوتۆتەوە و هاوڵاتیەكی خاوەن خانووی گوندی كۆڕی دەلێت 7000 دۆلاریان لێ وەرگرتوون، بەڵام لەئێستادا بەواستەش رێگا بەوە نادەن بچن سەیری پرۆژكەش بكەن، دەلێت سێ ساڵە ئێمە چاوەرێین، بەڵام ئەوەی ئێمە دەیبینین، ئەگەری هەیە دەساڵی تریش بخایەنێت بۆیە ئێمە چیتر چاوەرێ ناكەین و داوا لە پارێزگای هەولێر دەكەین مەمنونین پارەكەمان پێ بدەنەوە، ئێمە خانوومان ناوێت بە 13 ساڵ تەواو ببێت”.

پێشتر عەبدولرەحمان موهەندیس سەرۆكی لیژنەی ئاوەدانكردنەوە لە ئەنجوومەنی پارێزگای هەولێر رایگەیاندبوو، ژمارەی خانووەكانی گوندی کۆری بە گشتی شەش هەزار و ٥٠٠ خانووە كە نزیکەی هەزار خانووی تایبەت بە کرێچییان تەواو بووە لەگەڵ 500 خانووی پزیشکان و دەلێت  ئەگەر حكوومەت پابەندی مەرجەكانی پڕۆژەكە بێت، بە دابینکردنی بڕی ٢٠ هەزار دۆلاری تر لە ماوەی سێ مانگی داهاتوودا ئەو خانووانە بە خاوەنەکانیان دەدرێت”.

هاوڵاتیەك بەناوی عەبدولرحمان فارس دەلێت، پێش سێ ساڵ بەر لە ئێستا خانوێكی گوندی كۆڕیمان بۆ دەرچوو، منیش ئۆتۆمبێل خۆم بۆ پارەی پێشكەی فرۆشت بەڵام زیاتر لە سێ ساڵە تەنها لەدووری 2000 مەتر سەیری خانوە تەواو بووەكان دەكەین، رێگاشمان پێنادرێت بیبینین، دەلێت ئەم پرۆژەیە تەنها بۆ ئەوەیە پارەكەمان لێوەر بگرن و هەتا ئێستا هیچ هەواڵێكی نیە”.

هاوڵاتیەكی تر كە خاوەنی خانووەكەیە بەناوی كامەران بەكر، دەلێت نەك تەنها ناتوانین سەیری بكەین ئەوەی بۆ ئێمە بۆتە جێگای سەرسورمان هیچ هەواڵێكیش لە میدیاكان لەسەر ئەم پرۆژەیە ناكرێت، دەلێت بەردەوام بەدیار وێنەوە چاوەرێی خانووەكان دەكەین، بۆیە ئەگەر ناتوانن پێمان بدەن، ئەوە با پارەكانمان بدەنەوە چونكە وەزعمان زۆر خراپە با هەر پارەكە بدەینە كرێی خانوەكانی كە ئێستا بە گرێچی تێیداین”.

هەر لەبارەی پرۆژەكەوە ئەندازیاری سەرپەرشتی گوندی كۆڕی ئازام یاسین دەلێت پرۆژەكە لەكاتی خۆی دا ئەنجام نادرێت، بەڵام هەواڵی باش هەیە بۆ چارەسەر كێشە و گرفتەكانی ئەم پرۆژەیە”.

هاوڵاتیەكی شاری هەولێر لەبارەی پرۆژەكەوە دەلێت هیچ رۆشنایەك نیە بۆ ئەوەی چاومان لەو چاوەروانیەدا دووركەوێتەوە و دەلێت بەداخەوە پارێزگا هەولێر و كۆمپانیاكە هیچ هەواڵێكیان نیە لەبارەی پرۆژەكە”.

نووسینەگەیەكی خانوو و زەوی دەلێت بەشی زۆری ئەو كەسانەی كە خانووەكەیان بۆ دەرچوو، لەبەر دۆخی خراپی دارایی و دیار نەبوونی وادەی دابەش كردنی خانووەكان، خانوەكانیان فرۆشتۆتەوە، بەشێكیش داوا دەكەن، كە پارەكەیان بۆ بگەرێنێەوە، چونكە بازاری ئەو خانووانە رۆژ لە رۆژ خراپتر دەبێت پارەی پێشەكیەكەش ناكاتەوە، خەڵكیش ناتوانێ خانوەكان ببینێت، پرۆژەكە لە هاوڵاتیانی سودمەندبوو لەو گوندە شاردراوەتەوە، كەس نازانێت وەستاوە و یان كاری تێدا دەكرێت، تەواوی پرۆژەكە پەكی كەوتووە، خاوەن نووسینگەكە كە نەیویست ناوی ئاشكرا بكرێت، دەلێت من لەو باوەرەدام تا 10 ساڵی تریش ئەو خانوانە تەواو نەبن و دەلێت زانیاریم هەیە بەهەردوو خانووی پزیشكان و كرێچیەكان كە تەواو بوونە ئەو ژمارەیە نیە كە لەراگەیاندنەكان باس دەكرێت كە (1000 خانوو كرێچی و 500 خانووی دكتۆرەكان) لە پرۆژەی گوندی كۆڕی دا تەواو بووە، دەلێت من زانیاریم هەیە بەهەردوو خانووی دكتۆران و كرێچیەكان 600 كەمتر تەواو بووە و پرۆژەكەش وەستاوە”.

جێی ئاماژەیە، پڕۆژەی گوندی کۆری بۆ کرێنشینانی هەولێر راگەیاندرا، پێویستە کۆمپانیا، ئەو خانووانە لە ماوەی دوو ساڵ تەواو بکات و، پێشەکیی یەکەمی حەفت هەزار دۆلارە و کە لە ئیستادا ئەوانەی ناویان درەچووە بەشی هەرەزۆری ئەو پێشەکیەیان داوە، خاوەن ‌خانوو لەکاتی وەرگرتنی کلیلی خانووەکەیشدا 12750 دۆلاری دیکە دەدات و، ئەوەیشی دەمێنێتەوە کە 19750 دۆلارە بە مانگانە دەیداتەوە، بە شێوەیەک کە بۆ ماوەی 10 ساڵ هەر مانگێک ئەو هاووڵاتییەی خانوەکەی بۆ دەرچووە 164 دۆلاری لێ وەردەگیرێت بەڵام لەئێستادا هیچ زانیاریەك نیە لەسەر وادەی دابەشكردنی خانووەكان”.