بزانە هەفتەی رابردوو ئەمریكیەكان چیان بە نەوشێروان مستەفا گوتووە
خواكوڕك
بەگوێرەی زانیاریەكان ستیوارت جۆنز باڵيۆزی ئەمریکا لە عیراق، لەدانیشتنێكی هەفتەی رابردووی لەگەڵ نەوشیروان مستەفا چەند هێلێكی سووری بۆ نەوشێروان مستەفا لەعێراق و كوردستان روونكردۆتەوە. باڵيۆزی ئەمریکا لە عیراق پێی راگەیاندووە، سیاسەتی ئەمریكا لە عێراق و كوردستان چەند هێلێكی سوری بۆ هێزەكان داناوە لەباره‌ی چارەسەركردنی كێشەكانی عێراق و كوردستان.
سەرچاوەیەكی باوەڕپێكراو نزیك لە ئەنجوومەنی ناوەندی یەكێتی نیشتمانی كوردستان رایگەیاند، لە هەفتەی رابردوو باڵیۆزی ئەمریكا لە عێراق سەردانی سلێمانی كردوه و لەگەڵ نەوشێروان مستەفا كۆبۆنه‌وه. سەرەتا باسی بارودۆخی عێراق و ناوچەكە كراوە، پاشان داوای روونكردنەوە لە گۆڕان و یەكێتی كراوە لەباره‌ی جوڵە سیاسیەكانیان لەعێراق و كوردستان.
هەروەها ئەو سەرچاوە باوەرپێكراوە ئەوەشی روونكردەوە، كە باڵیۆزی ئەمریكا بەئاشكرا و راستەوخۆ بە نەوشێروان مستەفای راگەیاندوه ئاسایشی كوردستان هێلی سوورە. هەروەها پێی راگەیاندووە، كە نابێت پەناببردرێت بۆ سیناریۆكانی رابردوو لەلایەن هێزە كوردیەكانەوە، چونكە ئەوە لەلایان ئێمە هێلی سوورە لە كوردستان.
ئەو سەرچاوەیە گوتیشی باڵیۆزی ئەمریكا ئەوەشی بەنەوشێروان مستەفا راگەیاندووە، دەبێت كێبركێی سیاسی لەنێوان هێزە سیاسیەكان لەراگەیاندن و بانگەشەی هەڵبژاردنەكان تێنەپەرێت.
هەر بەگوێرەی زانیاریەكانی ئەو سەرچاوەیە لەمەر سەردانەكەی باڵیۆزی ئەمریكا بۆلای نەوشێروان مستەفا ئەوەش باسكراوە، كە هەر شارێك مافی خۆیەتی بریار لە چارەنووسی خۆی و ئیدارەدانی خۆی بدات، ناكرێت ئەو مافە بەكار بهێنرێت بۆ بەرژەوندی سیاسی حزبی، ئەگەر راستە ئێمە باوەڕمان بە سیستەمی دیموكراسی هەیە.
هەر لە قسەكانی باڵیۆزی ئەمریكاش بۆ نەوشێروان مستەفا دا هاتووە، كە مەسعود بارزانی بۆ ئەم قۆناغە زەرورەتی ناوچه‌كه‌یه و دەبێت وەك سەرۆك و فەرماندەی هێزی پێشمەرگە بمێنێتەوە.
