سالار محمود: ئەوروپا پێیان گوتین برۆن لە كوردستان كێشەكانی خۆتان چارەسەر بكەن
خواكوڕك
چوار پەرلەمانتاری كوردستان لە هەرچوار فراكسیۆنی پەرلەمان( یەكێتی و گۆڕان و كۆمەڵ و یەكگرتوو) كە لەماوەی رابردوو لەسەر داوای هەدەپە سەردانی هۆڵێكی پەرلەمانی ئەوروپایان كردبوو دوای ئەوەش نامەیەكیان رادەستی پەرلەمانی ئەوروپا كردبوو، كە پڕ بوو لە هەڵەی زمانەوانی، ئەمەش كاردانەوەی تووندی لەتۆڕە كۆمەڵایەتیەكانی بەدوای خۆی دا هێنا، ئەندام پەرلەمانتارێكی بەشدار لەو سەردانە دەلێت یەكێتی ئەوروپا پێیان گوتین برۆن لە كوردستان كێشەكانتان چارەسەر بكەن”.
سالار محمود ئەندام پەرلەمانی كوردستان لەسەر لیستی یەكێتی لەپاش گەرانەوەیان لە یەكێتی ئەوروپا لە كۆنگرەیەكی رۆژنامەنووسی دا، رایگەیاند كە یەكێتی ئەوروپا و ئەندامانی پەرلەمانی یەكێتی ئەوروپا پێیان گوتوون كە بچن لەكوردستان كێشەكانی خۆتان چارەسەر بكەن دەلێت”لە کۆبوونەوەکەماندا بەتێر و تەسەلی باسمان لە پرسی ڕیفراندۆم و سەربەخۆی ھەرێمی کوردستان کردووە، بۆیە ئێمە ھەرکاتێک ڕیفراندۆم بکەین، ئەوکاتە پەرلەمانی ئەورووپا بەشێوەیەکی یەکڕیزی پشتگیری لە ڕیفراندۆم و سەرەبەخۆیی کوردستان دەکات، بەڵام ئەوەندەی ئێمە تێگەیشتین ئەورووپا ڕاستەوخۆ دەست وەرناداتە کاروباری وڵاتان، ھەروەھا ھەموویان داوایان دەکردکە ئێمە خۆمان چارەسەری کێشەکانی خۆمان بکەین، بێگومان ئەوانیش پشتیوانی خەباتی یاسایی و دیموکراسی دەکەن”.
سالار مەحموود، ئەندامی پەرلەمانی کوردستان، لە فراکسیۆنی یەکێتیدا هەروەها راشی گەیاند: “وەک ئەرکێکی ئەخلاقی، بە مەبەستی پشتیوانی و ئازاکردنی پەرلەمانتارانی ھەدەپە، پەرلەمانتارانی کوردستان لەگەڵ پەرلەمانی ئەورووپا کۆبوونەوە، لە کۆبوونەوەکەشدا داوامان کردووە ھەنگاوەکان بۆ ئازاکردنی ئەو پەرلەمانتارانە چڕتر بکرینەوە”.
شایانی باسە پێشتر ئەو چوار پەرلەمانتارە لە میدیاكاندا وایان بڵاو كردەوە كە پەرلەمانی یەكێتی ئەوروپا لەسەر داوای ئەوان بریاری داوا بانگێشتی مەسعود بارزانی سەرۆكی هەرێمی كوردستان بكات لەسەر پەكخستنی پەرلەمانی كوردستان، بەڵام ساڵار محمود دەلێت پێیانگوتین برۆنەوە لەكوردستاندا بەخۆتان كێشەی خۆتان چارەسەر بكەن”.
