سێ ووڵاتی زلهێزی جیهان به‌ڵێنی پرچه‌ككردن و رێكخستنی هێزی پێشمه‌رگه‌یان دا
خواكوڕك
ئەمینداری گشتیی وەزارەتی پێشمەرگە رایده‌گه‌ێنێت”به‌ڵێنمان پێدراوه له لایه‌ن ئه‌مریكا به‌ریتانیا ئه‌ڵمانیا له 5 بۆ 10 ساڵی تر هاوكاری هێزه‌كانی پێشمه‌رگه‌ی كوردستان بن.
(فەریق جەبار یاوەر) ئەمینداری گشتیی وەزارەتی پێشمەرگە ئاشكرایكرد”هێزێكی سه‌ربازی تۆكمه و رێك و پێك درووست ده‌كرێت و حكومه‌تی هه‌رێم و تێمێكی سه‌ربازی پسپۆر له بواره‌كه كاری له‌سه‌رده‌كه‌ن، یه‌كخستنی پێشمه‌رگه‌ش كاری له‌سه‌ر ده‌كه‌ین هه‌ر ته‌نها به نیزامیكردن نیه، به‌مه‌ش هێزی پێشمه‌رگه زۆر به باشی رێكده‌خرێت.
ئەمینداری گشتیی وەزارەتی پێشمەرگە دەشڵێت، ئەنجوومەنی وەزیران داوای ئەو چاکسازییانەی کردووە. وەزارەتی پێشمەرگەش بە فەرمی داوای لە راوێژکارانی ئەڵمانیا، بەریتانیا و ئەمریکا کردووە، بۆئەوەی هاوکاریان بێت بۆ دانانی پلانێکی چاکسازی لەنێو هێزەکانی پێشمەرگە، یان دووبارە رێکخستنەوەی هەموو هێزەکانی پێشمەرگەی کوردستان، بۆئەوەی وەکو هێزێکی مۆدێرنی دەوڵەتانی دیکە بێت.
جەبار یاوەر باس لەوە دەکات، راوێژکارانی ئەو وڵاتانەش “دوای ئەوەی لەنێو هێزەکانی پێشمەرگە کاریانکردووە، هەندێ کەموکوڕیان لە گشت جومگەکانی پێکهاتەکانی پێشمەرگە بینیوە، ئەوانیش پێشنیازی ریفۆرمیان لەنێو هێزەکانی پێشمەرگەدا کردووە”.
هەر سەبارەت بە نێوەڕۆکی پرۆژەکە، جەبار یاوەر ئاشکرایکرد، پرۆژەکە خۆی لە 35 خاڵ دەبینێتەوە، لە خاڵی یەکەمدا پێشنیازی دروستکردنی بەڕێوەبەرایەتییەکی گشتیی چاکسازی لە وەزارەتی پێشمەرگە کراوە، کە لەلایەن کەسێکی شارەزا و لێهاتوو بەڕێوەببردرێت بۆ جێبەجێکردنی خاڵەکانی نێو پرۆژەکە. ئەو بەڕێوەبەرایەتییە گشتییە دەکەوێتە ژێر چاودێری ئەم لیژنەیەی ئێستا لەنێوان وەزارەتی پێشمەرگە و نوێنەرانی وڵاتانی ئەمریکا، ئەڵمانیا و بەریتانیا پێکهێندراوە.
