مەسرور بارزانی باسی یەكخستنەوەی هێزی پێشمەرگە دەكات
خواكوڕك
لەمیانی پێشوازی كردنی لە نێردەی تایبەتی سەرۆكوەزیرانی بەریتانیا بۆ كاروباری ئاسایش، مەسرور بارزانی رایگەیاند، سوپاسی گه‌ل و حكوومه‌تی به‌ریتانیای كرد له‌به‌رامبه‌ر به‌رده‌وامی و درێژه‌دانیان له پشتیوانی و یارمه‌تیدانی هێزه‌كانی پێشمه‌رگه‌ی كوردستان له شه‌ڕی دژ به تیرۆریستاندا و جه‌ختی له گرینگی یه‌كخستنه‌وه و پڕچه‌ككردنی پێشمه‌رگه كرده‌وه به شێوه‌یه‌ك هاوتای ستراتیژی ئاسایشی ئیقلیمی و روبه‌ڕووبوونه‌وه‌ی هه‌ڕه‌شه‌كان بێت”.
ئەمرۆ سێشەممە 9/5/2017 (مه‌سرور بارزانی) راوێژكاری ئه‌نجوومه‌نی ئاسایشی هه‌رێمی كوردستان له میانی پێشوازیكردن له (جه‌نه‌ڕاڵ تۆم بێكت) نێرده‌ی تایبه‌تی سه‌رۆك وه‌زیرانی به‌ریتانیا بۆ كاروباری ئاسایش له هه‌رێمی كوردستان و شاندی یاوه‌ری، جه‌ختی له گرینگی یه‌كخستنه‌وه و پڕچه‌ككردنی پێشمه‌رگه كرده‌وه به شێوه‌یه‌ك هاوتای ستراتیژی ئاسایشی ئیقلیمی و روبه‌ڕووبوونه‌وه‌ی هه‌ڕه‌شه‌كان بێت.
له دیدارێكدا، كه به ئاماده‌بوونی (فرانك بێكه‌ر) بالیۆزی به‌ریتانیا له عێراق و (جۆن شارب) هه‌ڵسوڕێنه‌ری كونسوڵی گشتی به‌ریتانیا له هه‌ولێر به‌ڕێوه‌چوو، گفتوگۆ له‌باره‌ی به‌رده‌وامی پێشڤه‌چوونه سه‌ربازییه‌كانی دژ به تیرۆریستانی داعش و پشتیوانی درێژخایه‌نی به‌ریتانیا بۆ هێزه‌كانی پێشمه‌رگه‌ی كوردستان كرا.
له‌لای خۆیه‌وه (جه‌نه‌ڕاڵ تۆم بێكت) باسی له گفتوگۆكانی پرۆژه‌ی تیمی به‌ریتانیا، ئه‌مریكا و ئه‌ڵمانیا له‌گه‌ڵ به‌رپرسانی باڵای هه‌رێمی كوردستان كرد به مه‌به‌ستی رێكخستنه‌وه و چاكسازی له وه‌زاره‌تی پێشمه‌رگه و هێزه‌كانی ئاسایشی كوردستاندا و رایگه‌یاند، له به‌ره‌نگاربوونه‌وه‌ی تیرۆریستانی داعشدا پێشمه‌رگه سه‌لماندی، كه براندێكی هێزی نێوده‌وڵه‌تییه.
جێی باسه وابڕیاره له دوو هه‌فته‌ی داهاتوودا پرۆژه هاوبه‌شه‌كه‌ی به‌ریتانیا، ئه‌مریكا و ئه‌ڵمانیا بۆ رێكخستنه‌وه و چاكسازی له هه‌یكه‌لی وه‌زاره‌تی پێشمه‌رگه بخرێته به‌رده‌ست سه‌ركردایه‌تی سیاسی كوردستان بۆ تاوتوكردن و په‌سندكردنی، هه‌ر له دیداره‌كه‌دا تیشكخرایه سه‌ر په‌ره‌سه‌ندنه ئیقلیمیه‌كان و ئه‌گه‌ری به‌ڕێوه‌چوونی ئۆپه‌راسیۆنی هاوبه‌ش بۆ پاككردنه‌وه‌ی پاشماوه‌كانی تیرۆریستان له‌دوای رزگاركردنی مووسڵ”.
له‌كۆتایی دیداره‌كه‌دا نێرده‌ی تایبه‌تی سه‌رۆك وه‌زیرانی به‌ریتانیا بۆ كاروباری ئاسایش له هه‌رێمی كوردستان دووپاتی كرده‌وه، كه وڵاته‌كه‌ی له راهێنان و مه‌شقكردن و یارمه‌تیدانی سه‌ربازی بۆ هێزه‌كانی پێشمه‌رگه‌ی كوردستان و ده‌زگاكانی ئاسایش له دوای كۆتایهاتنی تیرۆریستانی داعشیش به‌رده‌وام ده‌بێت.
