به‌ڤیدیۆ.. ئاسایشی هه‌ولێر دانپێدانانی گرووپێكی تاوانبار بڵاو ده‌كاته‌وه
خواکوڕک
به‌ڕێوه‌به‌رایه‌تیی ئاسایشی هه‌ولێر، له راگه‌یه‌ندراوێكدا ده‌ستگیركردنی گرووپێكی چوار كه‌سی ئاشكرا ده‌كات.
ئه‌مڕۆ سێشه‌ممه 9/5/2017 به‌ڕێوه‌به‌رایه‌تیی ئاسایشی هه‌ولێر له راگه‌یه‌ندراوێكدا كه وێنه‌یه‌کی بۆ (خواکوڕک) نێردراوه، تێدا هاتووه: “دوای ئه‌وه‌ی له نێو بازاڕی هه‌ولێر هێرش كرایه سه‌ر كاسبكارێك و بریندار كرا، هێزه‌كانمان به‌دواداچوونی وردیان كرد و توانیان ته‌واوی گرووپه‌كه ده‌ستگیر بكه‌ن”.
به‌ڕێوه‌به‌رایه‌تی ئاسایشی هه‌ولێر، له راگه‌یاندراوه‌كه، ئه‌وه‌شی خسته‌ڕوو: “به‌پێی دانپێدانانیان، هه‌ر یه‌ك له گۆران سه‌باح مه‌ولوود، محه‌مه‌د كاوه ئیسماعیل، ئه‌یاد ره‌ئوف مه‌حموود و هێرش جه‌لیل مووسا، دوای پیلان و چاودێریان له 1/4/2017 له‌ناو بازاڕی هه‌ولێر به چه‌كی ده‌مانچه هێرش ده‌كه‌نه سه‌ر هاووڵاتی محه‌مه‌د ئه‌بووبه‌كر، كه كاری ئاڵوگۆڕی دراو بووه، دوای بریندار كردنی، پاره‌كه‌ی ده‌دزن و هه‌ڵدێن”.
ئه‌وه‌شی روون كردوه‌ته‌وه: “ئه‌م گرووپه چه‌ند دزییه‌كی دیكه‌شیان ئه‌نجام داوه و پیلانیان بۆ كوشتنی هاوڕێیه‌كی دیكه‌شیان هه‌بووه له پێناو دزینی پاره‌كه‌یدا، به‌ڵام له‌لایه‌ن هێزه‌كانمانه‌وه ده‌ستگیر كران و پیلانه‌كه‌یان شكستی پێهێنرا”.
ئاسایشی هه‌ولێر، جه‌ختیش له‌وه ده‌كاته‌وه: “وه‌ك ئاسایشی هه‌ولێر، هه‌موولایه‌ك دڵنیا ده‌كه‌ینه‌وه له دۆزینه‌وه‌ی تاوانباران و ڕاده‌ستكردنیان به دادگاكان به‌رده‌وام ده‌بین”
