سەرۆك بارزانی و ئوسامە نوجەیفی باسی دوای قوناغی داعشیان كرد لە عێراقدا
خواكوڕك
ئەمرۆ دووشەممە 5ـی 6ـی 2017 لە سەلاحەدین مەسعود بارزانی پێشوازی لە شاندێكی باڵای حزبی (للعراق متحدون) كرد كە پێكهاتبوو لە ئوسامە نوجەیفی ئەمینداری حزب و جێگری سەرۆك كۆماری عێراق و ژمارەیەك لە ئەندامانی مەكتەبی سیاسیی حزبی (للعراق متحدون).
لە راگەیاندراوێكدا سەرۆكایەتی هەرێمی كوردستان باس لەوەش دەكات” لە دیدارەكەدا كە بە ئامادەبوونی فازڵ میرانی سكرتێر و د. ڕۆژ نوری شاوێس و ئازاد بەرواری ئەندامانی مەكتەبی سیاسیی پارتی دیموكراتی كوردستان بەڕێوەچوو، بیروڕا لەبارەی بارودۆخی سیاسی و ئەمنیی عێراق و شەڕی دژی تیرۆریستان لە موسڵ و قۆناغی دوای داعش ئاڵوگۆڕ كرا.
هەر لەم كۆبوونەوەیەدا كە سەرۆكایەتی هەرێم لە راگەیاندراوێكدا باسی كردووە، ڕۆشنایی خرایە سەر ئاییندەی سیاسیی عێراق و هەڵبژاردنەكان و مەترسیی نەمانی تەوافوق و شەراكەت و هەروەها ئەو تەحەدیاتەی كە لە قۆناغی داهاتوودا ڕووبەڕووی عێراق و ناوچەكە دەبنەوە.
لە كۆتایی راگەیاندراوەكەشدا هاتووە” لە بەشێكی دیكەی كۆبوونەوەكەدا هەردوولا هاوڕابوون لەسەر هەماهەنگی و پەیوەندی و ڕاوێژی بەردەوام لەمەڕ پێشهاتە سیاسییەكان.
