فیدراسیۆنی پەنابەران: سەربەخۆییی كوردستان مەترسییەكانی سەر پەنابەران كەمتر دەكاتەوە
![](https://xwakurk.com/wp-content/uploads/2017/06/ئارى-جةلال.jpg)
خواكوڕك
لەگەڵ ئەوەی ئێستا كار بۆ پێكهێنانی لێژنەی تایبەتە بۆ راپەڕاندنی كارەكانی پەیوەست بە سازدانی ریفراندۆم بۆ سەربەخۆیی كوردستان, لە زۆر لاوە پرسی سەربەخۆی كوردستان و سازدانی ریفراندۆم و سەربەخۆی كوردستان خوێندەوەی بۆ دەكرێت, لەو بارەیەوە سەرپەرشتیاری فیدڕاسیۆنی پەناپەبەران ئاماژەی بۆ ئەوە كرد، ئەگەر ھەرێمی كوردستان ببێتە دەوڵەتێكی سەربەخۆ، ئەوكات دەتوانێ بەرگری لەو پەنابەرانەی ھەرێم بكات، كە ھەڕەشەیان لەسەرە و دەڵێت، عێراق لەگەل ھەندێ وڵات ڕێك كەوتووە و دژی پەنابەران بڕیاری دەركردووە، ئەوەش زیانی ھەبووە لەسەر ژیانی پەنابەرانی ھەرێمی كوردستان.
ئاری جەلال سەرپەرشتیاری فیدڕاسیۆنی پەناپەبەران لە ھەرێمی كوردستان بە ماڵپەڕی فەرمیی پارتی دیموكراتی كوردستانی ڕاگەیاندووە: ”زۆرێك لەو بڕیارانەی دەربارەی پەنابەران دەردەكرێن بە پێی ڕێككەوتنی نێوان وڵاتانە، بۆیە زۆر جار كە بڕیارێك دەربارەی پەنابەران و ناردنەوەیان دەدرێت، بە ھۆی نەبوونی دەوڵەتەوە، حكوومەتی عێراق بڕیار لەسەر چارەنووسی پەنابەرانی كوردستانیش دەدات و بەو ھۆیەوە زیانی زۆریش بەر پەنابەرانی ھەرێمی كوردستان كەوتووە، بەتایبەت ئەوانەی لەلایەن وڵاتانی جیھانەوە مافی پێدانی پەنابەرییان ڕەت دەكرێتەوە و بەزۆر ڕەوانەی عێراق دەكرێنەوە.”
سەرپەرشتیاری فیدڕاسیۆنی پەناپەبەران لە ھەرێمی كوردستان گۆتیشی: ”ئەگەر ئێمە لە ھەرێمی كوردستان ببین بە دەوڵەتی سەربەخۆ، ئەوكات وڵاتان بۆ ھەر كێشەیەكی پەنابەران پرس بە دەوڵەتی كوردستان دەكەن و عێراق ھیچ مافێكی بەسەر ئێمەەوە نامێنێت، ھیوادارین دوای پڕۆسەی ڕیفڕاندۆم و ڕاگەیاندنی سەربەخۆیی، حكوومەتی ھەرێمی كوردستان پێداچوونەوە بەو بڕیارانەدا بكات، كە لە لایەن وڵاتانی ئەورووپاوە دژی پەنابەران دەركراون و ھیچ ڕێككەوتنێك بۆ ناردنەوەی بەزۆریی پەنابەران ئمیزا نەكات، جگە لەوەش ھێزی ھەبوونی دەوڵەت، ھێزی یاسایی زیاتر بە پەنابەران دەدات.”