سەرۆكی هەرێمی كوردستان پێشوازی لە سەرۆكی دەزگای مەدا دەكات
خواكوڕك
ئەمڕۆ شەممە مەسعود بارزانی سەرۆكی هەرێمی كوردستان پێشوازی لە فەخری كەریم سەرۆكی دەزگای مەدای میدیا و رۆشنبیری و هونەری عێراقی كرد. لە دیدارێكدا باس لە هەڵوێست لە هەمبەر ریفراندۆمی سەربەخۆیی كوردستان و پرسەكانی چوارچێوەی بەشداریكردن و تەوافوقی نیشتمانی لە عێراق كرا.
لە دیدارەكەدا بارزانی دووپاتی كردەوە كە ریفراندۆم مافی گەلی كوردە و دوای ئەنجامدانی ریفراندۆمیش پێویست دەكات لەگەڵ حكوومەتی فیدڕاڵی لە بەغدا و سەرجەم لایەنە پەیوەندارەكان دانوستان بكرێت كێشە هەڵپەسێردراوەكانی نێوان ناوەند و هەرێم چارەسەر بكرێت.
بارزانی ستایشی یەكریزی پارتە كوردستانییەكانی كرد سەبارەت بە ئەنجامدانی ریفراندۆم لە وادەی خۆی كە لەسەری رێككەوتوون. ئاماژەی بەوەش كرد كە گفتوگۆكان و رێكارەكان لە رۆژانی داهاتوودا رێگەی خۆی دەگرێ بۆ پتەوكردنی ئەو یەكگرتوویی و بەشداریكردنەی هەموو لایەك لە بەدیهێنانی مافی چارەی خۆنووسی بۆ گەلی كوردستان.
لە كۆتایی دیدارەكەدا جەخت لەسەر چارەسەركردنی پەیوەندییەكان لەگەڵ حكوومەتی فیدراڵ كرایەوە و ئەنجامدانی گفتوگۆ و دانوستانی پەیوەست بە پەیوەندییەكانی نێوان هەردوولا و كاركردنی پێكەوە بۆ ریشەكێشكردنی داعش و تیرۆر لە سەرتاسەری عێراق.
