رۆژنامەیەكی عەرەبی: دەوڵەتی كوردستان بە پشتگیریی ئەمریكا دادەمەزرێت
لەگەڵ نزیك بوونەوەی وادەی ریفراندۆمی سەربەخۆیی كوردستان, ئێستا دەزگا میجیایەكانی جیهان لە نێوانیشیدا ناوەندەكانی ڕاگەیاندنی عەرەبی، بە گەرمی باس لە ڕاپرسی و سەربەخۆیی كوردستان دەكەن و پێیانوایە ڕۆژهەڵاتی ناوەڕاست لە ڕێگەی دامەزراندنی دەوڵەتی كوردستانەوە گۆڕانی بەسەردادێت.
ڕۆژنامەی “ئەهرام ئەلمەسائی” بڵاویكردۆتەوە پرسی سەربەخۆیی كوردستان لەلایەن نەخشەسازی سەرەكی “مەسعود بارزانی” سەرۆكی هەرێمی كوردستان بەرەو پێشەوە دەبرێت و بە هاوكاری ئەمریكا و ڕۆژئاوا دەوڵەتەكە بۆ كورد دادەمەزرێت.
ڕۆژنامەكە باس لەوەدەكات ئەمریكا دەیەوێت دەوڵەتێك بۆ كوردانی ڕۆژئاواش دامەزرێنێت و دامەزراندنی ئەم دوو دەوڵەتەش ڕۆژهەڵاتی ناوەراستی نوێ درووستدەكات، ئەمەش خەونی نزیكەی چەندین ملیۆن كوردە كە لە وڵاتانی عێراق و سوریا و توركیا و ئێران دەژین.
باسی لەوەشكردووە ئەمریكا بۆ پارێزگاری لە دەوڵەتی كوردستان یارمەتی سەربازی ڕەوانە دەكات و چەندین بنكەی سەربازی لە كوردستان دادەمەزرێنێت.
