بەوێنە.. پێشمەرگە لە ڕاوە داعشە, 200 چەكداری دەستگیركرد

دوای دەست پێكردنی ئۆپەراسیۆنی كۆنتڕۆلكردنەوەی تەلعەفەرو عیازیە, داعش بە مەبەستی پەڕینەوەی بەرەو سووریا لە سەنگەرەكانی پێشمەرگە نزیك دەبنەوە, بە هۆیەوە دەكەونە نێو بۆسەی پێشمەرگە سەرچاوەیەك لە هێزەكانی پێشمەرگە، ئەمڕۆ سێشەممە (29/ 8/ 2017) ڕای گەیاند، نزیكەی 200 چەكداری داعش لە تەلەعفەر، خۆیان ڕادەستی هێزەكانی پێشمەرگە كرد.
سەرچاوەكەی هێزی پێشمەرگە، ڕای گەیاند: “نزیكەی 200 چەكداری داعش خۆیان ڕادەستی ئەو هێزانەی پێشمەرگە كرد، كە لە نزیك شارەكە جێگیركراون”.
سەرچاوەكە لە لێدوانەكەیدا بۆ ماڵپەری (سۆمەرییە نیوز)ی عێراقی باسی لەوەشكرد، كە چەكدارەكان لە شارەدێی عەیازییەوە لەگەڵ خێزانەكانیان هەڵاتوون.
لە ڕۆژی 20/ 8/ 2017، ئۆپەراسیۆنی ڕزگاركردنی تەلەعفەر لە دەست داعش دەستیپێكرد، بەڵام بەكەمتر لەهەفتەیەك و بە بێ شەڕی قورس هاوشێوەی شارە داگیركراوەكانی دیكە، شاری تەلەعفەر، ڕزگاركرا و ئەوەش لای چاودێران و شرۆڤەكارانی سەربازیی، بووەتە جێی گومان.
تەلەعفەر كە زۆرینەی دانیشتووانەكەی شیعە مەزهەبن، هەر بۆیە هێزەكانی حەشدی شەعبی لە ئۆپەراسیۆنی ڕزگاركردنیدا بەشداری كرد، دەكەوێتە خۆرئاوای باشووری شاری مووسڵ و دەكەوێتە سنووری پارێزگای نەینەوا، دوای مووسڵ، داعش بە پایتەختی خەلافەتەكەی لە عێراق دەستنیشانیكرد.