ئیلێستەر بێرد: لەسەر ریفراندۆم هەڵوێستی بریتانیا بە بەرپرسانی هەرێم رادەگەیەنم
![](https://xwakurk.com/wp-content/uploads/2017/09/5.jpg)
دوای سەردانی وەزیری بەرگری ئەمریكاو وەزیری دەرەوەی توركیاو, وەزیرانی دەرەوەو بەرگری فەڕەنسا لە دوو چەند هەفتەی رابردوو, ئێوارەی ئەمڕۆ وەزیری دەوڵەت بۆ كاروباری رۆژهەڵاتی ناوەڕاست و پەرەپێدانی مرۆیی بەریتانیا بۆ تاوتوێكردنی شەڕی داعش و پرسی ریفراندۆم لەگەڵ بەرپرسانی باڵای هەرێمی كوردستان كۆدەبێتەوە.
بەریتانیا لە دەستپێكردنی شەڕی داعش، رۆڵێكی كارای لە هاوپەیمانی نێودەوڵەتی گێڕاوە و چەندین راوێژكاری بە مەبەستی مەشق و راهێنانی پێشمەرگە لە هەولێر جێگیركراون.
لە لێدوانێكدا بۆ ژمارەیەك لە میدیاكانی هەرێمی كوردستان، ئیلێستەر بێرد، وەزیری دەوڵەت بۆ كاروباری رۆژهەڵاتی ناوەڕاست و پەرەپێدانی مرۆیی بەریتانیا رایگەیاند: “من لێرەم بۆ ئەوەی ستایشی هێزەكانی پێشمەرگە بكەم، كە لە بەرەكانی پێشەوەی شەڕدان و بەم دواییەش هەماهەنگییەكی زۆر باشیان لەگەڵ هێزەكانی عێراق دروستكرد و توانیان موسڵ و تەلەعفەر كۆنتڕۆڵ بكەنەوە”.
هەروەها گووتی: “بەریتانیا رێز لە قوربانییەكانی پێشمەرگە دەگرێت كە لە بری جیهان شەڕی تیرۆر دەكەن، پەیوەندییەكی زۆر باش لە نێوان لەندەن و هەولێر هەیە و من لێرەم بۆ ئەوەی پەیوەندییەكان بەرەو پێش ببەین. لە ماوەی مانەوەمدا، پرسی ریفراندۆم لەگەڵ بەرپرسان تاوتوێ دەكەم و هەڵوێستی بەریتانیایان پێ دەگەینم”.