دواین زانیاری له‌باره‌ی كۆبوونه‌وه‌ی ئه‌نجوومه‌نی سه‌ركردایه‌تی یه‌كێتی
ئه‌نجوومه‌نى سه‌ركردايه‌تى يه‌كێتى نيشتيمانى كوردستان كۆبوويه‌وه و پرسى كاراكردنه‌وه‌ى په‌رله‌مانى تاوتوێكرد و به دوو له‌سه‌ر سێى ئه‌ندامانى ئه‌نجوومه‌نه‌كه بڕياردرا په‌رله‌مان كارا بكرێته‌وه.
ده‌قى راگه‌يه‌ندراوه‌كه‌يه
رۆژی (7/9/2017) به‌سه‌رپه‌رشتی كۆسره‌ت ره‌سوڵ عه‌لی جێگری سكرتێری گشتی، كۆبونه‌وه‌ی ئاسایی ئه‌نجومه‌نی سه‌ركردایه‌تی یه‌كێتیی نیشتمانیی كوردستان له‌باره‌گای مه‌كته‌بی سیاسی له‌سلێمانی ئه‌نجامدرا.
له‌كۆبونه‌وه‌كه‌دا، به‌گیانێكی پڕ له‌هه‌ستی به‌رپرسیارێتی، گفتوگۆی هه‌ڤاڵانه له‌سه‌ر پرسه چاره‌نوسازه‌كانی: ریفراندۆم، چۆنیه‌تی كاراكردنه‌وه‌ی په‌رله‌مان، گرفته‌كانی ناوچه كێشه له‌سه‌ره‌كان، ئاماژه پۆزه‌تیڤ و نه‌گه‌تیڤه‌كانی جیهان و ناوچه‌كه‌و ناو عێراق له‌مه‌ڕ ریفراندۆم، درێژه‌پێدانی دانوستانه‌كان له‌گه‌ڵ حكومه‌تی عێراق و لایه‌نه سیاسیه‌كان، گفتوگۆی تێرو ته‌سه‌لیان له‌باره‌وه‌كرا. سه‌ره‌نجام، بڕیاردرا.
یه‌كه‌م/ په‌رله‌مانی كوردستان، له‌سه‌ر هه‌ندێك بنچینه‌ی یاسایی و ئابوری و سیاسی پێویسته به‌زووترین كات كارا بكرێته‌وه.
دووه‌م/ وه‌فدێكی یه‌كێتی، په‌یامی ئه‌نجومه‌نی سه‌ركردایه‌تی، بۆ چۆنیه‌تی كاراكردنه‌وه‌ی په‌رله‌مان، له‌م دوو رۆژه‌دا ده‌گه‌یه‌نێته بزووتنه‌وه‌ی گۆڕان و كۆمه‌ڵی ئیسلامی. وه‌فدی یه‌كێتی-یش بۆ گفتوگۆ له‌گه‌ڵ پارتی له‌سه‌ر نه‌خشه‌رێگای یه‌كێتی و ریفراندۆم، هه‌مان بنچینه، بۆ پارتی و لایه‌نه‌كانی دیكه، رون ده‌كه‌نه‌وه.
