نێچێرڤان بارزانی بۆ چی بێ دەنگە؟!
پیران ئەمیر
لە ماوەی ڕابردوو هەندێک لە میدیاکان بە مەبەست و ئامانجی دیاریکراو پرسی بێدەنگی نێچیرڤان بارزانی و ڕیفراندۆمی سەربەخۆییان قۆستەوە بۆ بەبازاڕکردنی (تسویق) هەواڵ و خوێنەر لەخۆ کۆکردنەوە،ئاخر لە دنیای ڕاگەیاندندا کەسایەتیە گەورەو کاریگەرەکان زۆرجار بێدەنگیشیان دەبێتە هەواڵی گرنگ چونکە میدیا دەزانێت کە ئەو جۆرە کاراکتەرانە چەند کاریگەریان لەسەر کۆمەڵگا هەیە.
ئیشی ئێمە شیکار کردنی ئامانجی میدیاکان نیە لەم وتارەدا،بەڵکو قسەکردنە لە هەژاری و کورت بینی هەندێک میدیاکارو میدیا،ئەوان پێیان وایە پشتگیری کردن لە سەربەخۆیی تەنها لە ڕێگەی گوتارەوە دەبێت،بێ ئاگا لەوەی ئەم پرسە چارەنوس سازە پێویستی بە دابەشکردنی ڕۆڵ و کارەکانە (توزیع الآدوار)،تۆ کاتێک سەرنج دەدەیت جەنابی سەرۆک جگە لە پێشوازی لە شاندی وڵاتان و دیدارە کەسی و گشتیەکان بە وڵاتاندا وەک گەڕیدە پەیامی گەلی کوردستان و ئامانجی ڕیفراندۆمی سەربەخۆیی ڕوون دەکاتەوەو بە حەفتاو یەک ساڵی تەمەنەوە بۆتە کێوی ورەو وزە بۆ هەموان و نێچیرڤانیش جگە لە دەرکەوتنێکی کەم و پێویست نەبێت بە سروستی خۆی دوور لە چاوی میدیا لەبەئەنجام گەیاندنی ئەرکەکانی بەردەوامە،لە بواری ئاسایش و ئارامیشدا دیارە کە کوردستان لە ناو ئاگری ڕۆژهەڵاتی ناوەڕاست چەند ئارام و هێمنە.
ڕوونە پێشتر بنەماکانی دەوڵەت خاک،خەڵک و سیستم بوون لێ لە ئێستا ڕاگری هەرە بنەڕەتی دەوڵەتی هاوچەرخ بونی پەیوەندی دبلۆماسی و پێکەوە گرێدانی بەرژەوەندیەکانە لەگەڵ کۆمپانیاو وڵاتە زلهێزەکان لە لایەک و پرسی مافی مرۆڤ و ئازادی و پێکەوە ژیانە لە لایەکی تر،هەموانیش لێمان ڕوونە کۆڵەکەی ئابوری سەربەخۆی کوردستان ئەندازیارەکەی نێچیرڤان بارزانیە،جا گەر لە بری چاو بە عەقڵ و داناییەوە لەو پرسانە بڕوانین کە ڕاگری دەوڵەتی هاوچەرخن دەرک دەکەین نێچیرڤان بارزانی یەكێكە لە کاراکتەرە سەرمەشقەکانی پرسی سەربەخۆیی کوردستان و گومان کردن و گومان دروست کردن لە مەڕ پشتیوانی و کارەکانی بە ئاڕاستەی سەربەخۆیی کوردستان لە ڕاستیدا جگە لە خۆگەوجاندن و کاڵفامی شتێکی دیکە نیە.
