نێچیرڤان بارزانی سبەی رۆژی بەدیهێنانی خەونی هەزاران شەهیدە
![](https://xwakurk.com/wp-content/uploads/2016/12/Nicervan-Barzani.jpg)
لەگەڵ نزیك بوونەوەی وادەی كردنەوەی دەرگای بنكەكانی دەنگدان بە رووی دەنگدەرانەوە, نێچیرڤان بارزانی سەرۆكی حكومەتی هەرێمی كوردستان, پەیامێكی بڵاو كردەوە لە پەیامەكەی هاتووە:” سبەی ، ڕۆژی سەرخستنی كوردستان و گەلی كوردستانە بە هەموو پێكهاتە نەتەوەیی و ئایینییەكانییەوە، ڕۆژی بەجێگەیاندنی ئەركی نیشتمانی و نەتەوەییمانە، ڕۆژێكە دەبێ تیایدا هەموو ناكۆكی و ململانێ و نیگەرانییەكانمان بەلاوە بنێنین و بە جۆش و خرۆشەوە بچینە سەر سەندووقەكانی دەنگدان و بڵێن: بەڵێ بۆ سەربەخۆییی كوردستان”
لە بەشێكی دیكەی پەیامەكەیدا هاتووە:” سبەی هەتا بەشداری و دەنگی بەڵێتان لە ڕێفراندۆمی سەربەخۆییدا زیاتر بێت، هێزێكی زیاتر بە كوردستان دەدەن و گەرەنتییەكی گەورەتر بۆ بەدەستهێنانی مافەكانتان و دروستكردنی كوردستانێكی سەربەخۆی بەهێز دەستەبەر دەكەن، بۆیە با هەموومان سبەی پێكەوە بەرپرسانە، بە ئارامی و لە كەشێكی شارستانیانەی ئازاد و دیموكراسیدا بڵێن: بەڵێ بۆ سەربەخۆییی كوردستان، بۆ ژیان و داهاتوویەكی تازە، بۆ پەیوەندیی دۆستانە لەگەڵ دراوسێكانمان و لەگەڵ جیهان.
دەقی پەیامەكە
كوردستانیانی خۆشەویست،
سبەی 25ی ئەیلوول ڕۆژی ڕیفراندۆمی سەربەخۆییی كوردستان، ڕۆژی دیاریكردنی چارەنووسە، ڕۆژی بڕیاردانه لە داهاتوویەكی باشتر بۆ خۆمان و نەوەكانمان، ڕۆژی هەنگاونانە بەرەو بەدیهێنانی خەونی هەزاران شەهید و ئەنفالكراو و كیمیابارانكراو و ڕفێنراو، ڕۆژی سەرخستنی كوردستان و گەلی كوردستانە بە هەموو پێكهاتە نەتەوەیی و ئایینییەكانییەوە، ڕۆژی بەجێگەیاندنی ئەركی نیشتمانی و نەتەوەییمانە، ڕۆژێكە دەبێ تیایدا هەموو ناكۆكی و ململانێ و نیگەرانییەكانمان بەلاوە بنێنین و بە جۆش و خرۆشەوە بچینە سەر سەندووقەكانی دەنگدان و بڵێن: بەڵێ بۆ سەربەخۆییی كوردستان.
كوردستانیانی ئازیز،
سبەی هەتا بەشداری و دەنگی بەڵێتان لە ڕێفراندۆمی سەربەخۆییدا زیاتر بێت، هێزێكی زیاتر بە كوردستان دەدەن و گەرەنتییەكی گەورەتر بۆ بەدەستهێنانی مافەكانتان و دروستكردنی كوردستانێكی سەربەخۆی بەهێز دەستەبەر دەكەن، بۆیە با هەموومان سبەی پێكەوە بەرپرسانە، بە ئارامی و لە كەشێكی شارستانیانەی ئازاد و دیموكراسیدا بڵێن: بەڵێ بۆ سەربەخۆییی كوردستان، بۆ ژیان و داهاتوویەكی تازە، بۆ پەیوەندیی دۆستانە لەگەڵ دراوسێكانمان و لەگەڵ جیهان.
نێچیرڤان بارزانی