سبەی پەرلەمانی عێراق لادانی دكتۆر فوئاد مەعسوم تاوتوێ دەكات
دوای ئەوەی پەرلەمانی عێراق لە ماوەی رابردوو رۆلی گەورەی بینی لە قولكردنەوەی ناكۆكیەكانی نێوان هەولێر بەغدا, كە جگە لە لە كارلادانی نوێنەرانی كوردستان لە حكومەتلا عێراق لە ژێر فشاری هەژموونی تائیفی و شۆڤینی بڕیاری دژ بە هێنانە خوارەوەی ئاڵای كوردستان لە ناوچە كوردستانیەكانی دەرەوەی ئیدارەی هەرێم و هەڵوەشاندنەوەی بڕیاری ڕیفراندۆمی سەربەخۆیی كوردستانی دەكرد, وا بڕیارە سبەی چوارشەممە جارێكی دیكە دانیشتنی پەرلەمان دژ بە كورد بە كاربهێنرێت, مژاری لە كار لادانی سەرۆكی كۆماری عێراق تاوتوێ بكات,
لە دوایین هەوڵدا پەرلەمانتارانی عەرەب گەیشتوونەتە ڕێكەوتنێك لەسەر تۆمەتباركردنی مەعسوم بەوەی سوێندی سەرۆكایەتیەكەی كەوتووە بۆ پاراستنی یەكپارچەیی خاكی عێراق
ئەمڕۆ سێشەممە زەینەب خەزرەجی پەرلەمانتاری شیعی بۆ ڕۆژنامەی (ئەلعەرەبی ئەلجەدید)، دووپاتی كردووەتەوە كە مەعسوم سوێندی كەوتووە و دەستووری عێراقی پێشێل كردووە، چونكە ریفراندۆمی سەربەخۆیی كوردستانی قبووڵ كردووە.
ئەمەش لە كاتێكدایە كە پەرلەمانتارانی شیعە بەردەوامن لە كۆكردنەوەی ئیمزا بۆ خستنەڕووی داوای دەست لەكاركێشانەوەی سەرۆكە كوردەكە.
خەزرەجی گوتی “تا ئێستە ژمارەی ئیمزاكانی پەرلەمانتاران گەیشتووەتە 80 ئیمزا، تا سبەی زیاتریش دەبێت”.
