بۆ عه‌بادی جبل الاشم ،هیچ ڕاده‌ست ناكات
د.محمد خدر مولود
هێشتا كف و كۆڵی نێو فنجانه‌كه‌ی عه‌بادی نه‌نیشت بوه وه ، ماناو مه‌غزای وتاره‌كه‌ی سه‌رئاوكه‌وتن و زۆربه‌ی شرۆڤه‌كارانی عه‌ره‌ب ، به هه‌ندێ په‌رله‌مانتارانی عه‌ره‌بی عێراقیشه‌وه وای بۆ چوون كه‌وا مه‌به‌ست له وتاره پڕ له هه‌رو گیفه‌كه‌ی،ده‌نگ كۆكردنه‌وه‌یه بۆ هه‌ڵبژاردنی ئاینده. به‌دیوه‌كه‌ی تریش ، بۆ خۆ نواندنیش له نێو توركیاو ئێران دا گوایه خاوه‌نی سیاده‌ی عێراقه ، له كاتێكدا هه‌موو ده‌زانین باخچه‌ی دواوه‌ی ئه‌نجومه‌نی وه‌زیرانی عێراق ، له باخچه‌ی پێشوه‌ی له مێژه لێك ترازاوه و خه‌ڵكی كه‌رخ و ڕه‌سافه‌ی ئه‌و به‌غدایه‌ی كه هه‌ر به‌ناو پایته‌خته بۆ سونه و شیعه ، به‌ر له كه‌رنه‌فاڵه ملیۆنییه سه‌ربه‌خۆییه‌كه‌ی ریفراندۆمی گه‌لی كوردستان له ٢٥ی ئه‌یلول دا به‌ته‌واوه‌تی لێكترازاو ، لێكدابراون ، چ جای پارێزگای ئه‌نباری سونه نیشین كه جه‌عفه‌ری وه‌زیری ده‌ره‌وه‌ی ده‌وڵه‌ته‌كه‌ی عه‌بادی به پارێزگاره تیرۆریسته‌كه ناوی دێنێ ، ئه‌وه باس له ناوچه سوننه نشینه‌كانی دیكه‌ش ناكه‌ین ، به‌گشتی نێو ماڵی عێراقی بلد ئه‌لنیفاق پێچه‌وانه‌ی تێگه‌یشتنی رێكس تیله‌رسۆندای وه‌زیری ده‌ره‌وه‌ی ئه‌مریكا یه و له‌مێژه تۆتالیتاری یه ، نه‌ك فیدرالی و دیموكراتی ، پاشكه‌وتووه نه‌ك پێشكه‌وتوو ، سه‌رانی عێراق له به‌غدا خۆیان سیاسه‌تی په‌رتكه‌و زاڵبه‌یان په‌یره‌وكردوه ، سه‌رئه‌نجامیش عه‌بادیش تێكه‌وت و بۆیه ده‌كرێ بپرسین ئه‌رێ به‌رێز عه‌بادی تۆ كه ناو ماڵه‌كه‌ی خۆت پێكۆناكرێته‌وه ، یه‌كێتی نێو ماڵی شیعه و نێوانی سونه‌ت له‌ده‌ست داوه ئه‌م پڕدان و هه‌ڕ و گیفه‌ی له كوردستان،له‌دراوسێه‌یه تازه‌یه‌ت ده‌كه‌ی له‌پای چی یه ؟
به‌و هیستریایه‌ت ڕابوونی نه‌ته‌وه‌یه‌كی وه‌كو كوردی جه‌ربه‌زه ده‌ترسێنێ ؟ نه‌ته‌وه‌یه‌ك جه‌واهیری شاعیری ناودار گوته‌نی :
- وعنده من : ابجديات الضحايا …. یه‌ی هه‌بێ ،
چۆن خاك و ئاسمانت ڕاده‌ست ده‌كا ؟
به‌رێز عه‌بادی سیاسه‌تمه‌داری ئاقڵ و ژیر له‌سه‌ركه‌وتنا مه‌غروور نابێ و له‌شكستیشا نائومێد .
كوردستان و بارزانی له دوای ریفراندۆمی سه‌ربه‌خۆیی رۆژی ٢٥-٩-٢٠١٧ ، ئه‌مرۆ به هێمنی و ژیری ، دوور له غروور و غه‌فڵه‌تی سه‌ركه‌وتنه مه‌زنه‌كه له چاوه‌ڕوانی پێشهاته تازه‌كاندان ، ئه‌و پێشهاتانه‌ی بۆ مرۆڤی نه‌ته‌وه‌و نیشتیمانی ئازاد و سه‌ربه‌ست دێنه پێش ، گه‌لۆ ، ئێستا ڕه‌وشه‌كه گه‌لێ جیاوازتره له جاران ، مرۆڤی بێ ئیراده‌ی به‌ر له ٢٥- ی ئه‌یلول گوزه‌شت .
به‌رێزم ، ئه‌وه‌ی له‌په‌رله‌مانی عێراق گوتت زمانی زبری پڕ له هیستریای ته‌واوی حاكمه‌كانی ١٠٠ ساڵه‌ی عێراقی لێده‌خوێندرایه‌وه ، له نێو دێره‌كانیدا هانات بۆ قاره‌مانیه‌تی فه‌خد و ئه‌فخادی عه‌دنان و قه‌عتان ده‌برد ،شمشێری شعوبیه‌ت و مه‌زهه‌بگه‌رایی و عروبه‌ت له‌نێو په‌رله‌مانا پریسكه‌ی ده‌دا !! ئه‌رێ ئه‌وه چی بوو ؟ چی ده‌گوزه‌را له به‌رله‌مانی عێراقا ؟ شه‌ره‌شمێری ئه‌فخاده‌كانی عه‌دنان و حه‌جاجی ئه‌نفاڵچی ؟ یا فلیمی كاوبۆیی ته‌كساس ؟
به‌رێز ریكس تیله‌رسۆن ئه‌مه‌یه عێراقی فیدراڵی دیموكراتی پێشكه‌وتوو ؟
بۆ پێتان وایه كوردستان ، ئه‌و گه‌له‌ی جه‌واهیری شاعیری ناوداری به‌نی قه‌ومی عه‌بادی له ساڵی ١٩٦٤ له به‌رامبه‌ر ئازایی و ڕه‌وایی پرسه‌كه‌دا بۆ كوردستان و به‌ناوی ( ئه‌مین و مسته‌فا ) وه له چامه ناوداره‌كه‌ی ( جبل الاشم ) گوتویه‌تی :
شعب دعائمة الجماجم و الدم
تتحطم الدنيا ، و لا يتحطم
ئاسمان و خاكت ڕاده‌ست ده‌كا ؟
