عێراق سزاكانی لەسەر هەرێمی كوردستان هەڵدەگرێت
ئەمڕۆ بارزانی لە شاری سلێمانی لەگەڵ عەلاوی و نوجەیفی كۆبووەتەوە و لەمیانەدا لەسەر چەند خاڵێك ڕێككەوتوون كە یەكێكیان بریتییە لە هەڵگرتنی دەستبەجێی سزاكانی عێراق لەسەر هەرێمی كوردستان.
ماڵپەری فەرمی سەرۆكایەتی هەرێمی كوردستان بڵاویكردەوە ئەمرۆ شەممە (7/10/2017) مەسعود بارزانی سەرۆكی هەرێمی كوردستان لە شاری سلێمانی لەگەڵ هەریەكە لە ئەیاد عەللاوی و ئوسامە نوجەیفی جێگرانی سەرۆك كۆماری عێراق كۆبووەوە.
ئاشكراشكراوە كە لەم كۆبوونەوە سێ قۆڵییەدا گفتوگۆ كرا لەبارەی باروودۆخی هەنوكەیی كە عێراق پێیدا تێپەڕ دەبێت، و چۆنیەتی چارەسەركردنی بابەت و كێشە پەیوەندیدارەكان بە گۆڕەپانی سیاسی.
لەم بارەیەوە فوئاد حوسێن سەرۆكی دیوانی سەرۆكایەتی هەرێمی كوردستان رایگەیاند، ئامادەبووانی كۆبوونەوەكە رێككەوتن لەسەر ئەم خاڵانەی خوارەوە:-
– دەستپێكردنی گفتوگۆ و كۆبوونەوەكان لەنێوان لایەنە سیاسییە سەرەكییەكان لە عێراق بۆ هێوركردنەوەی باروودۆخەكە.
– كۆبوونەوەكان لەسەر ئەجێندای كراوە ئەنجام بدرێن.
– هەڵگرتنی دەستبەجێی سزاكان لەسەر هەرێمی كوردستان.
– دەستپێكردنی كۆبوونەوەكان لە داهاتوویەكی نزیكدا ، بە پشت بەستن بە ئالیەتێكی تایبەت بۆ هەماهەنگی بەردەوام.
