فه‌رمانده‌یی هێزه‌كانی پشتیوانی یەک: هیچ هێزیك بۆی نیه پێ بنێته نێو خاكی كوردستان
فه‌رمانده‌یی هێزه‌كانی پشتیوانی یەکی سەر بە فەرماندەیی لەشکری کوردستان له باره‌ی هێرشكردنه سه‌ر خاكی كوردستان له‌لا یه‌ن حه‌شدی شه‌عبی یا هه‌ر هیزیكی تره‌وه له راگه‌یاندراوێكدا دەڵێت ” گەلی خۆمان دڵنیا ده‌كه‌ینه‌وه كه كه‌س ناتوانێت پێ بنێته نێو خاكمان و چۆن شكۆی داعشمان شكاند، به‌و شێوه‌یه‌ش رێ لە‌و كه‌س و لایه‌نانه ده‌گرین كه بیانه‌وێت خاكمان داگیر بكه‌ن”.
لە راگەیێندراوێکیدا فه‌رمانده‌یی هێزه‌كانی پشتیوانی یەک كه وێنه‌یه‌كی بۆ (خواكوڕك) نێردراوه و تێیدا هاتووه” دوای ئه‌و سه‌ركه‌وتنه مه‌زنه‌ی گه‌لی كوردستان له پرۆسه‌ی ریفراندۆم تۆماری كرد و بڕیاری له داهاتووی خۆیدا و به‌ڕێژه‌یه‌كی به‌رز ده‌نگی به‌ڵێ سه‌ركه‌وت، هه‌ندێك لایه‌ن و كه‌سایه‌تی كه‌وتوونه‌ته هه‌ڕه‌شه‌كردن له خه‌ڵك و خاكی كوردستان”.
فەرماندەیی هێزەکانی پشتیوانی یەک ئاماژەی بەوەشکردووە “چۆن له‌و ماوه درێژه‌دا له‌به‌رده‌م دڕنده‌ترین دووژمنی مرۆڤایه‌تی راوه‌ستاین و خاكمان پاككرده‌وه، بۆ ئاسووده‌بوونی رووحی شه‌هیدانمان و به‌جێگه‌یاندنی ئه‌نجامی ریفراندۆم، كه مه‌به‌ست لێی سه‌ربه‌خۆییه بۆ كوردستانە، به‌و شێوه‌یه‌ش راده‌وه‌ستین كوردستان له دووژمنانمان ده‌كه‌ینه گۆڕستان”.
