هێمن هه‌ورامی: هه‌موو كورد پێشمه‌رگه‌یه بۆ پاراستنی كه‌ركوك
پاش ئه‌وه‌ی شه‌وی رابردوو، پلانێكی مه‌ترسیداری هێزه‌كانی حه‌شدی شه‌عبی و سوپایی عێراقی، له ده‌ووروبه‌ری كه‌ركوك ئاشكرا كرا له لایه‌ن ئه‌نجوومه‌نی ئاسایشی هه‌رێمی كوردستانه‌وه بۆ هێرشكردنه سه‌ر خاكی كوردستان و كه‌ركوك به‌تایبه‌تی، له‌و باره‌وه “هێمن هه‌ورامی” راوێژكاری سیاسی سه‌رۆكی هه‌رێمی كوردستان، ده‌ڵێت” هه‌موو كورد پێشمه‌رگه‌یه بۆ پاراستنی كه‌ركوك.
(هێمن هه‌ورامی) ڕاوێژكاری سیاسی سه‌رۆكی هه‌رێمی كوردستان، له تویتێكدا له لاپه‌ڕه‌ی فه‌رمی خۆی له تویته‌ر نووسیویه‌تی” كه ژماره‌یه‌كی زۆر له هێزی پێشمه‌رگه به چه‌كی قورسه‌وه له كه‌ركوك جێگیركراوه بۆ پاراستن و وه‌ڵامدانه‌وه‌ی هه‌رمه‌ترسییه‌ك له لایه‌ن حه‌شدی شه‌عبییه‌وه.
هه‌ورامی ئه‌وه‌شی راگه‌یاندوه” كه ئێمه میله‌تێكی ئاشتی خوازین و هه‌رگیز هێرش ناكه‌ینه سه‌ركه‌س به‌ڵام له ئه‌گه‌ری هه‌ر شتێكی نه‌خوازراودا هه‌موو تاكێكی كورد پێشمه‌رگه‌یه بۆ پاراستنی كه‌ركووك، له هه‌مانكاتدا داوا له كۆمه‌ڵگه‌ی نێوده‌وڵه‌تی ده‌كه‌ین كه هه‌لوێست وه‌ربگرن له‌به‌رامبه‌ر ئه‌م كاره‌ی حه‌شدی شه‌عبی و داواش له حه‌یده‌ر عه‌بادی ده‌كه‌ین كه فه‌رمان به گه‌ڕانه‌وه‌ی هێزه‌كانی حه‌شدی شه‌عبی بكات ئه‌گه‌ر له‌توانایدا هه‌یه و گوێی لێده‌گیرێت.
ئه‌وه‌ی شیاوی باسه” دوێنێ شه‌و له‌سه‌ر فه‌رمانی سه‌رۆكی هه‌رێمی كوردستان كه هاوكات فه‌رمانده‌ی گشتی هێزه چه‌كداره‌كانی كوردستان، بڕیار درا به ناردنی هێزی زیاتر بۆ پاراستنی شاری كه‌ركوك، و هه‌ریه‌كه له كۆسره‌ت ره‌سوڵ جێگری سه‌رۆكی هه‌رێم و محه‌مه‌دی حاجی مه‌حمود فه‌رمانده‌یی پێشمه‌رگه گه‌یشتنه شاره‌كه و به‌شێكی زۆر له هێزی پاڵپشتی زێره‌ڤانی گه‌یشتنه كه‌ركوك و له سه‌نگه‌ره‌كان جێگیر كران،بۆ رووبه‌ڕووبنه‌وه‌ی هه‌ر ئه‌گه‌رێكی نه‌خوازراو.
