نێچیرڤان بارزانی: تاكە چارەسەر دیالۆگ و گفتوگۆی نێوان هەولێر و بەغدایە
لەمیانەی پێشوازیكردنی لە نێردەی تایبەتی سكرتێری گشتیی نەتەوە یەكگرتووەكان لە عێراق ، سەرۆك وەزیرانی هەرێمی كوردستان ڕایگەیاند كە تاكە چارەسەر كێشەكان دیالۆگ و گفتوگۆیەكی جددییە لە نێوان هەولێر و بەغدایە.
ماڵپەری فەرمی حكوومەتی هەرێمی كوردستان بڵاویكردەوە كە ئێوارەی ئەمرۆ سێشەممە 24/10/2017 نێچیرڤان بارزانی سەرۆك وەزیرانی هەرێمی كوردستان، پێشوازی لە یان كۆبیش نێردەی تایبەتی سكرتێری گشتیی نەتەوە یەكگرتووەكان لە عیراق و شاندێكی یاوەری كرد.
لە دیدارێكدا كۆبیش نیگەرانیی خۆی سەبارەت بە ڕووداوەكانی چەند رۆژی ڕابردووی كەركووك و ناوچەكانی دیكە دەربڕی و ئاماژەی بەوە دا كە لەگەڵ بەغدا هەوڵی ئەوە دەدەن گرژی و ئاڵۆزییەكان و جموجۆڵە سەربازییەكانی عیراق بوەستێنرێن و هەموو لایەك دان بەخۆیاندا بگرن.
دووپاتیشی كردەوە كە باشترین چارەسەر بۆ كۆتاییهێنان بەم بارگرژییە، زەمینەسازییەكی گونجاوە بۆ گفتوگۆ و دیالۆگ لە نێوان هەولێر و بەغدا و هیوای خواست ئەو كردەوانە چیتر نەبنە هۆكاری ئاوارەبوونی خەڵك.
لای خۆیەوە سەرۆك وەزیرانی هەرێمی كوردستان سوپاسی ئەو سەردانەی كرد و دووپاتی كردەوە كە تاكە چارەسەر دیالۆگ و گفتوگۆیەكی جددییە لە نێوان هەولێر و بەغدا، ئاماژەی بەوەش دا كە هەرێمی كوردستان پێش و دوای ڕیفراندۆمیش هەمیشە خوازیاری ئەنجامدانی دیالۆگێكی جددی بووە لەگەڵ بەغدا و لەمباریەوە ڕۆڵی نەتەوە یەكگرتووەكان و وڵاتانی هاوپەیمانی بۆ زەمینەسازی بە پێویست زانی.
دووپاتی كردەوە كە دەبێت جموجۆڵە سەربازییەكان بوەستێنرێن چونكە لە بەرژەوەندیی ئارامی و ئاسایشی ناوچەكەدا نییە و كێشەكان زیاتر دەكات، ئامادەییی حكوومەتی هەرێمی كوردستانیشی بۆ دیالۆگێكی جددی لەگەڵ بەغدا دووپات كردەوە.
