دواى سەردانی عەبادی توركیا رایگەیاند كە سنوری ئیبراهیم خەلیل داناخات
ئەگەر چی پێشتر حكومەتی توركیاو عێراق رایان گەیاندبوو كە رێككەوتوون لە بارەی داخستنی دەروازەی سنوری ئیبراهیم خەلیل, بەڵام دوای رۆژێك لە سەردانی عەبادی كە وەك لە میداكان بڵاوكرایەوە سەردانەكە سەركەوتوو نەبووە, حكومەتی توركیا رایانگەیاند كەدەروازەی ئیبراهیم خەلیل بەكراوەیی بمێنێتەوە و داینەخات. جەختیكردەوە، كە نایانەوێت هاووڵاتیانی هەرێمی كوردستان زیانیان پێبگات.
بنیالی یەڵدرم، سەرۆك وەزیرانی توركیا، لە كۆنگرەیەكی ڕۆژنامەوانیدا ڕای گەیاند: “دەروازەی ئیبراهیم خەلیل داناخەین و بەكراوەیی دەمێنێتەوە”.
جەختیشیكردەوە، كە نایانەوێت هاووڵاتیانی هەرێمی كوردستان زیانیان پێبگات. وتیشی: “هیوادارین كێشەی تر دروست نەبێت”.
لێدوانی سەرۆكی وەزیرانی توركیا، دوای ئەوە دێت كە بەهۆی ئەنجامدانی ڕیفراندۆمی سەربەخۆیی كوردستانەوە، چەند جارێك هەڕەشەی داخستنی ئەو دەروازە سنوورییەیان دەكرد، بڕیارەكەشی دوای كەمتر لە 24 كاتژمێر بەسەر سەردانەكەی حەیدەر عەبادی، سەرۆك وەزیرانی عێراق بۆ ئەنقەرە دێت.
