فراكسیۆنی پارتی له‌په‌رله‌مانی عێراق به‌یاننامه‌یه‌كی بڵاو كرده‌وه
له راگه‌یاندراوێكدا فراكسیۆنی پارتی دیموكراتی كوردستان له په‌رله‌مانی عێراق به‌تووندی دژی ئه‌و پێشه‌ڵكاریانه‌ی به‌رامبه‌ر به خه‌ڵكی شاری كه‌ركووك و دۆزخورماتوو، هاته ده‌نگ و وه‌ك له راگه‌یاندراوه‌كه داهاتووه” به‌ناوى فراكسیۆنى پارتییه‌وه، جارێكى تر دووپاتى ده‌كه‌ینه‌وه، كه ده‌بێت یاسا و ده‌ستوور ڕێڕه‌وى ڕاسته‌قینه‌ى خۆیان بۆ چاره‌سه‌ركردنى هه‌موو قه‌یران و ناكۆكییه سیاسییه‌كان له‌سه‌ر ئاستى هه‌رێمى كوردستان و حكوومه‌تى فیدڕاڵی، یان له‌سه‌ر ئاستى نێوخۆى هه‌رێم بگرێته‌به‌ر، داواش له هه‌موو لایه‌نه‌كان ده‌كه‌ین، زمانى گفتوگۆ و له‌یه‌كتێگه‌یشتن تاكه ڕێگا بێت بۆ گه‌یشتن به‌چاره‌سه‌ر”.
هه‌روه‌ها فراكسیۆنی پارتی دیموكراتی كوردستان له باره‌ى ڕووداوه‌كانى شه‌وى ڕابردوو 29/ 10/ 2017 راگه‌یاندراوه‌كه‌دا كه كۆپیه‌كی بۆ خواكوڕك نێردراوه ده‌شلێـ”له‌ئه‌نجامى لێدوانى نابه‌رپرسانه‌ى یه‌كێك له په‌رله‌مانتاره‌كانى كوردستان ڕوویاندا”. داواش له لایه‌نه به‌رپرسه‌كانى ئاسایش و سه‌قامگیریی كوردستان ده‌كه‌ن، ڕووبه‌ڕووى هه‌ر هه‌وڵێكى ئاژاوه‌نانه‌وه ببنه‌وه و بوار به‌كه‌س نه‌ده‌ن دۆخه‌كه بقۆزێته‌وه، هه‌روه‌ك داواش له لایه‌ن و حزبه‌كان ده‌كه‌ن، له ئاست به‌رپرسیارێتیدا بن، هاوكات ئیدانه‌ى شه‌هیدكردنى ڕۆژنامه‌نووس (ئه‌ركان شه‌ریف) وێنه‌گرى كه‌ناڵى ئاسمانى كوردستان تیڤی ده‌كه‌ن له داقووق، كه به به‌رچاوى خێزانه‌كه‌یه‌وه له ماڵه‌كه‌ى خۆیدا درایه به‌ر چه‌قۆ. هه‌ر به‌و بۆنه‌یه‌وه، داواش له حكوومه‌تى عێراق ده‌كه‌ن، به بڕیارى داخستنى كه‌ناڵه كوردستانییه‌كاندا بچێته‌وه، كه: “ڕۆڵى گرنگیان له ڕووماڵكردنى شه‌ڕى دژ به داعشیان كرد، نه‌ك هه‌ر ئه‌وه، به‌ڵكو له‌وه‌ش زیاتر ئه‌و كه‌ناڵانه باجى ده‌رخستنى ڕاستییه‌كانیان به خوێن دا”.
هه‌روه‌ها ئاماژه به‌وه‌ش دراوه، كه سه‌رۆك وه‌زیرانى عێراق و لایه‌نه ئه‌منییه‌كان و گروپه چه‌كداره‌كان به به‌رپرسیارى پاراستنى گیانى هه‌موو ئه‌و هاوولاتیانه ده‌زانن، كه له ناوچه‌كانى دواى ڕووداوه‌كانى 16ى ئه‌كتۆبه‌رن، جه‌ختیش ده‌كه‌نه‌وه، كه ئه‌و تاوانانه‌ى هاووڵاتیان و ڕۆژنامه‌نووسانى ئه‌و ناوچانه ده‌كه‌نه ئامانج، عاقیبه‌تى خراپی به‌سه‌ر لایه‌نه‌كانى ئه‌نجامده‌ر ده‌بێت.
