سوپا و حەشد هەڕەشەی دەستپێكردنەوەی پەلامارەكانیان بۆ سەر كوردستان دەكەن
لە راگەیەندراوێكدا فەرماندەیی ئۆپراسیۆنە هاوبەشەكانی عێراق هەڕەشەی ناردنی هێز و بەرەنگاربوونەوەی هەرێم دەكات، ئەگەر بێت و هەولێر بە مەرجەكانیان رازی نەبێت، لە بەرامبەریشدا سەرچاوەیەكی ئاگادار بۆ كوردستان 24 رایگەیاند، هەرێمی كوردستان داوایكردووە، كێشەكان بە رێگە چارەی سیاسی چارەسەر بكرێن، نەك بە لەشكركێشی سەربازی.
لە راگەیەندراوەكەی فەرماندەیی ئۆپراسیۆنە هاوبەشەكانی عێراقدا هاتووە: شاندی هەرێم پەشیمان بووەتەوە لەو رێككەوتنە بەراییەی واژوو كرابوو، دەیانەوێت یاری بە كات بكەن و بگەڕێینەوە بۆ چوارچێوەی یەكەم و هەرێم هەوڵدەدات هێزەكانی جوڵە پێبكات و خاڵی بەرگری دابنێت و رێگری لە بڵاوبوونەوەی هێزەكانمان بكات و ئێمەش لەوە بێدەنگ نابین و وادەیەكمان بۆ هەرێم دیاریكردووە بۆ بڵاوبوونەوەی هێزەكانمان و هیوادارین رێگریش لە هاتنی هێزەكانمان نەكەن بۆ ئەوەی خوێن نەڕژێت، بەڵام ئەگەر هێزە چەكدارەكانی هەولێر چەك بەكاربهێنن و بە شەڕ وەڵامی هێزەكانمان بدەنەوە، ئێمەش بە چەكی یاسا وەڵامیان دەدەینەوە.
لە وەڵامی ئەو هەڕەشانەدا سەرچاوەیەكی ئاگادار لە هەرێمی كوردستان رایگەیاند، ئێمە لە وەڵامی پێشنیازەكانی حكومەتی عێراق، پێشنیازی نوێمان لە بارەی خاڵە سنوورییەكان و ناوچە جێناكۆكەكان خستووەتەڕوو، دیارە عێراق رەتیدەكاتەوە و عێراق دەیەوێت هێزی زیاتری چەكداری رەوانەی ناوچە سنوورییەكان بكات و ئێمەش پێمان وایە ئەوە پرسێكی سەربازی نییە و دەبێت بە شێوەیەكی سیاسی چارەسەر بكرێت، نەك بە شەڕ و خۆسەپاندنی سەربازی.
