لێسه‌ندنه‌وه‌ی متمانه له وه‌زیره‌كان كێشه‌ی عێراق چاره‌سه‌ر ناكات
خواكوڕك
حكومه‌ت و په‌رله‌مانی عێراق تا ئێستا متمانه‌ی له چه‌ند وه‌زیرێكی كابینه‌ی عه‌بادی سه‌ندۆته‌وه و چاوه‌ڕوانیش ده‌كرێت ژماره‌ی لێسه‌ندنه‌وه‌ی متمانه له وه‌زیره‌كان به‌ره‌و زیاتر هه‌ڵكشێ.
به‌شێك له چاودێرانی سیاسی پێیانوایه ئه‌م رێگه‌چاره‌یه چاره‌سه‌ری كێشه و گرفته قوڵه‌كانی دامه‌زراوه ده‌وڵه‌تی و حكومیه‌كانی ئه‌و وڵاته ناكات، به‌ڵكو ته‌نیا ماوه‌یه‌ك برینه‌كان سڕده‌كات. كێشه‌كانی دارایی و كه‌می خزمه‌تگوزاریه‌كان و دۆسیه‌ی ئه‌منی شاره‌كانی عێراق و جه‌نگی داعش، به‌ته‌واوی ئه‌و ولاته‌یان شه‌كه‌ت و وێران كردووه به‌جۆرێك پێناچی به‌مزووانه بتوانێت چاره‌سه‌ری ریشه‌یی بۆ ئه‌م كێشانه بدۆزێته‌وه.
له‌ماوه‌ی رابردوو هه‌ریه‌كه له عادل عه‌بدولمه‌هدی وه‌زیری نه‌فت و باقر جه‌بر ئه‌لزبه‌یدی وه‌زیری گواستنه‌وه و محه‌مه‌د ئه‌لغبان وه‌زیری ناوه‌خۆ و تارق خه‌یكانی وه‌زیری بنیاتنان و نیشته‌جێكردن و محه‌مه‌د ده‌راجی وه‌زیری پیشه‌سازی و محسن شه‌مه‌ری وه‌زیری سه‌رچاوه‌كانی ئاو، ده‌ستیان له‌كاره‌كانیان كێشاوه‌ته‌وه و له‌لایه‌ن حیدر عه‌بادی ده‌سله‌كاركێشانه‌وه‌كه‌یان قبوڵ كراوه، به‌ڵام هیچ یه‌ك له ده‌ستله‌كاركێشانه‌وه‌ی ئه‌م حه‌وت وه‌زیره نه‌بۆته هۆكاری به‌ره‌وپێشچوون یان گۆڕانكاری له هیچ سێكته‌رێكی ئه‌و وڵاته.
