ئەمینداری گشتی كۆمكاری عەرەبی: دەستوەردانەكانی ئێران لەناوچەكە رەتدەكەینەوە
ئەحمەد ئەبولغەیت ئەمینداری گشتی كۆمكاری عەرەبی دەڵێت “هەموومان لەگەڵ سعودیاین بۆ رووبەڕووبوونەوەی هەرەشە دەرەكیەكان”. ئەم قسانەی ئەبولغەیت لە پرێس كۆنفرانسێكدا هاتوون و جەختی كردەوە، ئەو دژایەتیەی لەئێستادا بەرامبەر بە سعودیا هەیە، لە هیچ سەردەمێكدا نەبووە.
ئەبولغێت لەبارەی دەستێوەردانەكانی ئێران گوتی: جیهانی عەرەبی كۆدەنگە لەسەر رەتكردنەوەی ئەو هەنگاوانەی ئێران، ئەو دەستوەردانانە گرژی و ئاڵۆزیەكان زیاتر دەكەن و بە ئەجێندایەك كاری بۆ دەكرێت، كە ئامانجی سەپاندنی هەیمەنەتی لایەنێكە بەسەر لایەنێكی دیكەدا، ئەمەش كارێكی قیزەوەنە و لەلایەن هیچ كەس و لایەنێكەوە قبووڵ ناكرێت.
ئەمینداری گشتی كۆمكاری عەرەبی گوتی “لەكاتێكدا سعودیا رووبەڕووی ئەو هەرەشە مەترسیدارانەی ئەمنی بووەتەوە، ئەركی هەموو وڵاتانی عەرەبییە شان بەشانی عەرەبستانی سعودیا بەڕووی ئەو هەرەشانه بوەستنەوە” جەختیشی كردەوە “فراوانبوونی رووبەری ئاڵۆزیەكان لە یەمەن مایەی نیگەرانییە و گومانی تێدا نییه، دەستی هەندێ لایەنی ناسراو لەپشتیەوەیە، ئامانجیشیان نەك تەنیا بەردەوامیدانە بەو دۆخە ناهەموارەی ئێستا لەیەمەن دەگوزەرێت، بەڵكو مەبەستی سەرەكیان شێواندنی دۆخی ئەمنی تەواوی ناوچەكەیە”، ئەمەش وەك ئاماژەیەك بۆ پشتگیریە سەربازیەكانی ئێران بۆ حوسیە شیعەكانی یەمەن لە دژی سعودیا.
ئەبولغەیت ئاماژەی بەوەشكرد “ناوچەكە هەرگیز سەمقامگیری بەخۆیەوە نابینێت، تا ئەو لایەنانەی دەستوەردان دەكەن بە سیاسەتەكانیاندا بەرامبەر بە وڵاتانی ناوچەكە نەچنەوه، پێویستە دەست لەو رێبازە هەڵگرن كە لەساڵانی رابردوودا پەیڕەویان دەكرد، كە ناوچەكەیان بەرەو دۆخێكی هەڵدێر بردووە”.
