ته‌واوی زانیاری له‌باره‌ی نامه‌كه‌ی یه‌كێتی ئه‌وروپا كه بۆ نێچیرڤان بارزانی نێردراوه
خاتوو فیدێریكا مۆگێرینى، كۆمیسارى باڵاى سیاسه‌تى ده‌ره‌وه و ئاسایشى یه‌كێتیى ئه‌ورووپا نامه‌یه‌ك بۆ نێچیرڤان بارزانى سه‌رۆك وه‌زیرانى هه‌رێمى كوردستان ناردووه له نامه‌كه‌دا، خاتوو مۆگێرینى هاوخه‌میى یه‌كێتیى ئه‌وروپا له‌گه‌ڵ هه‌رێمى كوردستان ده‌رده‌بڕیت بۆ قوربانیانى ئه‌و بوومه‌له‌رزه‌یه‌ى ڕۆژى 12ى ئه‌م مانگه چه‌ند ناوچه‌یه‌كى هه‌رێمى كوردستانى گرته‌وه و ده‌ڵێت: “سه‌ره‌تا ده‌مه‌وێ له دڵه‌وه سه‌ره‌خۆشى له قوربانیانى ئه‌و بوومه‌له‌رزه‌یه بكه‌م كه ڕۆژى 12ى نۆڤه‌مبه‌ر هه‌رێمى كوردستانى گرته‌وه، هه‌روه‌ها خاتوو مۆگێرینى وێڕاى سوپاس و پێزانین بۆ هاوبه‌شى و سه‌ركرایه‌تیى مه‌سعود بارزانى، خۆشحاڵیى یه‌كێتیى ئه‌ورووپاى بۆ ئاماده‌یى و هه‌وڵه‌كانى هه‌رێمى كوردستان له‌پێناو چاره‌سه‌ركردنى كێشه‌كانى له‌گه‌ڵ به‌غدا له ڕێگه‌ى دیالۆگه‌وه نیشان ده‌دات و نووسیویه‌تى: “ئێمه له نزیكه‌وه و به نیگه‌رانییه‌وه له پێشهاته مه‌یدانییه‌كانمان ڕوانیوه، ماوه‌ى چه‌ند هه‌فته‌ى ڕابردووش كارى له‌پێشینه‌مان ئه‌وه بووه كه ڕێگرى له توندوتیژى بكرێت له هه‌ر لایه‌نه‌كه‌وه بێت، هه‌روه‌ها پشتگیریى ئه‌و هه‌وڵانه‌مان كردووه كه بۆ چاره‌سه‌ركردنى كێشه‌كان دراون، وه‌ك ڕێكاره ئه‌منییه‌كان له ناوچه جێناكۆكان. یه‌كێتیى ئه‌ورووپا به‌رده‌وامیشه له چاودێریكردنى دۆخه‌كه و هاوكاریى مرۆیى پێشكه‌ش ده‌كات”.
