سەرۆكایەتیی پەرلەمان: بەغدا دانوستان نەكات، كشانەوە لە پرۆسەی سیاسیی عێراق بژاردەیەكی كراوەیە

دوای ئەوەی ئەمڕۆ سەرۆكایەتی پەرلەمانی كوردستان لەگەڵ, نوێنەرو كوسنوڵی وڵاتان لە هەولێر كۆبوونەوە, سكرتێری پەرلەمانی كوردستان رایگەیاند، بە كۆنسووڵ و نوێنەری وڵاتانیان گوتووە، هەرێمی كوردستان دانوستانی بەلاوە گرینگە و هەمیشەش ئامادەیی خۆی بە پابەندبوون بە دەستوور نیشان داوە، بەڵام ئەگەر بەغدا گفتوگۆ رەت بكاتەوە لەگەڵ هەرێمی كوردستان، ئەوا بژاردەی كشانەوە لە پرۆسەی سیاسیی عێراق كراوەیە.

وەك بڕیار بوو، ئەمڕۆ پێنجشەممە، سەرۆكایەتیی پەرلەمانی كوردستان و سەرۆكی فراكسیۆنەكان لەگەڵ كۆنسووڵ و نوێنەری وڵاتان لە هەرێمی كوردستان كۆ بوونەوە و پەیامی هەرێمی كوردستانیان لەبارەی كێشەكانی هەولێر و بەغدا پێگەیاندن.

لە كۆنفڕانسێكی رۆژنامەوانیدا (جەعفەری ئێمنیكی) جێگری سەرۆكی پەرلەمانی كوردستان رایگەیاند: “پەرلەمانی كوردستان لەم ماوەیەدا جالاكیی زۆری هەبووە لەبارەی دۆخی هەرێمی كوردستان، هەروەها راسپاردەی تەواوی بۆ گفتوگۆی حكوومەتی هەرێمی كوردستان لەگەڵ بەغدا ئامادە كردووە و هیواخوازین زوو گفتوگۆكانی نێوان هەردوولا دەست پێ بكات”.

هاوكات (بێگەرد تاڵەبانی) سكرتێری پەرلەمانی كوردستان رایگەیاند “هەموو دەزانین هەرێمی كوردستان بە چ دۆخێكدا تێپەڕ دەبێ و پێوەندیی هەولێر و بەغدا لە چ ئاستێكدایە، لەم ڕووەوە وەكو پەرلەمانی كوردستان پەیامی خەڵكی كوردستانمان گەیاندە نێوەندە نێودەوڵەتییەكان و نوێنەرایەتیی وڵاتان لە هەرێمی كوردستان”.

سكرتێری پەرلەمانی كوردستان راشیگەیاند “پەیامی ئێمە ئەوە بووە كە كورد میللەتێكی ئاشتیخوازە و دەیەوێت لە چوارچێوەی دەستووری عێراقدا دیالۆگی خۆی لەگەڵ بەغدا دەست پێ بكات، بۆ ئەو مەبەستەش ئێمە لە دانیشتنی رابردووی پەرلەماندا راسپاردەیەكی 18 خاڵیمان داوەتە حكوومەتی هەرێمی كوردستان، كە تێیدا باسی هەموو ئەو خاڵ و ماددانەمان كردووە، كە لە رەشنووسی بودجەی عێراق ئێستا ئامادە كراوە، تاوەكو ئێستا نەچووەتە پەرلەمان و واژۆی لەسەر نەكراوە، بەڵام پێشێلكاریی زۆری مافە دەستوورییەكانی كوردستانی تێدایە، ئەوەش كاریگەرییەكی زۆر گەورە لەسەر بژێوی ژیانی خەڵكی كوردستان دادەنێت”.

(بێگەرد تاڵەبانی) گوتیشی كە دەیانەوێ بەر لە واژۆكردنی رەشنووسەكە “ئێمە دیالۆگمان بە لاوە گرینگە و پابەندبوونی خۆیشمان بە دەستووری عێراق دووپات كردووەتەوە، ئەگەر بێت و حكوومەتی عێراقیش پابەند نەبێت یاخود نەیێتە نێو دانوستاندن لەگەڵ حكوومەتی هەرێمی كوردستان و ڕەچاوی ڕێككەوتنەكانی نێوانمان نەكات كە لە ڕابردوودا كردوومانن، ئێمە لە بەیاننامەكە و ئەمڕۆیش دووپاتمان كردەوە كە بژاردەی كشانەوە لە پرۆسەی سیاسیی عێراق بژاردەیەكی كراوەیە و پەرلەمانی كوردستان كار بۆ دەستەبەركردنی كۆدەنگی لەو بوارەدا دەكات. بەڵام بەر لەم هەنگاوە دانوستانمان بە لاوە گرینگە.”