باڵی دەسترۆیشتووی یەكێتی گاڵتە بە خوێنی هەڵەبجەییەكان دەكات
خواكوڕك
بەگوێرەی زانیاریەكانی دەستی خواكوڕك كەوتووە، حەنان فەتلاوی بە نهێنی لەلایان باڵی دەسترۆشتووی یەكێتی بردراوەتە هەلەبجە و سەردانی مۆنۆمێنتی هەڵەبجەی كردووە لەوێوە لێدوانی دژی كورد و بەئامانجی پارچەكردنی كوردستان داوە.
دوێنێ شەممە، حەنان فەتلاوی، ئەو ژنە سەرکردە عێراقییەی کە بە دژایەتیکردنی ڕاستەوخۆی خەونی سەربەخۆیی گەلی کوردستان ناسراوە دژی پێشمەرگە و شەهیدانی كوردستان بەناوبانگە، بە نهێنی سەردانی مۆنۆمێنتی هەڵەبجەی کردووە و لە لایەن ئیدارەی مۆنۆمێنتی هەڵەبجە و ئەندامێکی کۆمەڵەی قوربانییانی هەڵەبجە و چەند کەسێکی دیکەوە پێشوازی لێ کراوە. ئەمە لەكاتێكدایه بە بەڵگە و ڤیدیۆ لەسەر ئاشكرا بووە كە حەنان فەتلاوی كادیری چاڵاكی حزبی بەعسی روخاوی بووە، شیعری بەسەر سەدام و بەعسدا گووتەوە.
چاڵاكوانانی هەلەبجە لەمبارەیەوە بۆ ماڵپەری باس دەلێن”فەتلاوی یەکێک بووە لە ئەندامانی حزبی بەعسی قەدەغەکراو. نەدەبوو مۆنۆمێنتی هەڵەبجە دەستی کەسێکی وا بگرن و سەردانی مۆنۆمێنتی پێ بکەن. ئەم شارە 5 هەزار قوربانی بە دەست حزبی بەعسەوە داوە. جەختیشی لەوە کردەوە: “بە نهێنی پێشوازی لێ کراوە و دوور لە چاوی خەڵکی هەڵەبجە بووە. ئەگەر بە ئاشکرا بووایە، خەڵکی هەڵەبجە دژی هاتنی دەوەستانەوە“.
هەر لەبارەی وێنەكەو سەردانەكەی حەنان فەتلاوی ئەو چاڵاكوانانەی هەلەبجە دەشلێن ”ئەگەر دەسەڵاتدارانی ئەو دەڤەرە بۆ ململانێ سیاسییەکان ئامادەبن پێشوازی لە هەر کەسێک بکەن، ئەوا هیچ بیانووێک نییە بۆ ئەوەی کەسێکی وەک فەتلاوی سەردانی هەڵەبجە بکات“. لە بارەی وێنەکەشەوە، گوتی: ”ئەو وێنەیە لە یەکێک لە بەشداربووانی پێشوازیکردنەکە بە نهێنی دەستمان کەوتووە، ئەگەر حاڵەتەکە باش و ئاسایی بووایە، بەرپرسانی مۆنۆمێنت و دەسەڵاتدارانیش بە ئاشکرا پێشوازییان لێ دەکرد“.
