دیپلۆماتكارانی ئەمەریكا: داواى بەدەست هێنانەوەی متمانەی كورد دەكەن , ئەگەرنا ئێران دەیباتەوە
دوای ئەوەی ئەمریكا لە بەرامبەر هێرشەكانی حەشدی شەعبی و سوپای پاسداران بۆ سەركوردستان بێدەنگ بوو, ئێستا لەسەر ئاستی باڵای ئەمریكا بە تایبەت بەشێك لە دیپلۆماتكار و ئەفسەرە باڵاكانی ئەمریكا ئاشكرای دەكەن، لەبەر نەبوونی سیاسەتێكی ژیرانەی كۆشكی سپی لە عیراق و سوریا، لەئێستادا ئەمریكا ڕووبەرووی كێشە و گرفتی زیاتر بووەتەوە و گۆڕەپانیان بۆ كاریگەری و هەژمونەكانی ئێران لەناوچەكدا واڵاتركردووە.
لەمبارەیەوە “چارڵز واڵد” ئەفسەرێكی باڵای خانەنشینكراوی هێزە ئاسمانیەكانی ئەمەریكا دەڵێت: ئەگەر ئەمریكا بیەوێ ڕەوشی عیراق چاك بكاتەوە دەبێ هۆشیاری لە زۆر بوارەوە بداتە حكومەتی بەغدا و جەختی كردەوە، ئەگەر ستراتێژ و سیاسەتێكی زیرەك و ڕوون لە كۆشكی سپی و وەزارەتی دەرەوەی هەبووایە بۆ پێگەی ئەمریكا لە عیراق، ئەوا هەرگیز چەك و كەلو پەلە سەربازییەكانمان نەدەكەوتنە دەستی میلیشیاكانی سەر بە سوپای پاسدارانی ئێران و هێرشی پێ بكەنە سەر دۆستی ڕاستەقینەی ئەمریكا لە ناوچەكەدا.
ئەمەش وایكردووە ئەمریكا بیر لەوە بكاتەوە، هەنگاوی خێرا بنێت بۆ بەرپەرچدانەوەی فراوانخوازیەكانی خێرای هەژموونی ئێران لە عیراق و سوریا، كوردیش لەم نێوانەدا سەنگێكی قورسە بۆ گۆڕینی كێشی لاسەنگەكە، چاودێرانی سیاسی لە واشنتۆن دەڵێن ئێستاش كات بەسەرنەچووە بۆ ئەوەی ئەمریكا لاسەنگەكە بباتەوە، بەمەرجێك دیسان متمانەی شەقامی كوردستانی بەدەست بهێنێتەوە.
